- Bosh sahifa
- Maslahatchi minbari
- TIL – MILLAT MAʼNAVIYATINING MUATTAR GULTOJI
TIL – MILLAT MAʼNAVIYATINING MUATTAR GULTOJI
Insoniylik martabasining asosiy bezagi, millat
maʼnaviyatining so‘nmas mashʼali, taraqqiyot omili til hisoblanadi. Inson
jamiki fikr-munosabatlari, his-tuyg‘u, kechinmalarini til orqali namoyon
qiladi. Shu boisdan, til jamiyatning asosiy aloqa-aralashuv vositasi,
ruhiy-maʼnaviy takomil mezoni sanaladi.
Har qanday til so‘zlardan tarkib topadi, so‘zlar
orqaligina harakatlanadi, yashaydi, qadru qimmat kasb etadi. Shuning uchun ham,
so‘z tilning eng muhim tayanchi, boyligi, asosiy manbasi hisoblanadi. Bu ikki tushuncha
bir-biri bilan shu qadar qattiq bog‘lanib, uyg‘unlashib ketganki, aksar
hollarda so‘z deganda til, til deganda so‘z ham tushunilib ketaveradi. So‘zni
anglash va qadrlash o‘z tilini anglash va qadrlash bilan barobardir. Bu borada,
ulug‘ mutafakkirlarimiz ham o‘zlarining qimmatli mulohaza va tavsiyalarini
ilgari surishadi, milliy tilni asrab-avaylash, kelgusi avlodga sofligini
saqlagan holda yetkazishni uqtirishadi. Jumladan, jadid maʼrifatparvarlarining
yetakchi namoyandasi Abdulla Avloniyning quyidagi kuyunchak fikrlari biz uchun
hamisha ibrat maktabi bo‘la oladi:
Hifzi lison deb har bir millat o‘z ona tili va
adabiyotini saqlamagini aytilur. Har bir millatning dunyoda borlig‘in
ko‘rsatadurgan oyinai hayoti til va adabiyotidur. Milliy tilni yo‘qotmak
millatning ruhini yo‘qotmakdur. Hayhot! Biz turkistonlilar milliy tilni
saqlamak bir tarafda tursun, kundan-kun unutmak va yo‘qotmaqdadurmiz.
Tilimizning yarmiga arabiy, forsiy ulangani kamlik qilub, bir chetiga rus
tilini ham yopishdurmakdadurmiz... Zig‘ir yog‘i solub moshkichiri kabi qilub,
aralash-quralash qilmak tilning ruhini buzadur.
Darhaqiqat, milliy til taraqqiyoti yoki aksincha,
tanazzuli shu millat vakillarining o‘z ona tiliga bo‘lgan munosabati, hurmatiga
chambarchas bog‘liqdir. Har bir millat vakili qayerda tug‘ilmasin va
yashamasin, avvalo, o‘zining ajdodlaridan meros bo‘lib kelayotgan ona tilini
muqaddas bilish, uni yot tillardagi so‘zlar bilan qorishtirib tashlamasdan,
sofligini saqlash uchun asosiy masʼuldir.
Milliy tilni qadrlash va avaylash borasida millatning
mutafakkir siymolari, so‘z ijodkorlari harchand uqtirishmasin,
tushuntirishmasin, har qanday davr va jamiyatda o‘z ona tiliga nisbatan sovuq
va qo‘pol munosabatda bo‘lib, unga chet so‘zlarni aralashtirib gapirishni, yoki
yarim-yorti ishlatishni xush ko‘radigan, ushbu maʼnaviyatsizlikni
“zamonaviylik”, “oliftalik” bilan o‘lchaydigan insonlarni ham ko‘plab kuzatish
mumkin. Bu hol, ayniqsa, bugungi ilm-fan, texnika jadal suratlar bilan
rivojlanayotgan, globallashgan davrda yanada keng quloch yoyib bormoqdaki,
milliy tilni har tomondan qo‘riqchi askardek qo‘riqlash, bu boradagi huquqiy
asoslarni tobora kuchaytirish taqozo etilmoqda.
Xususan, bugungi jamiyatimizda oddiy so‘zlashuv
nutqida o‘z milliy tiliga nisbatan bepisandlik, ona tili meʼyorlarini buzib
ifodalashdan faxr tuyayotgan yoshu kattani birdek uchratishimiz nihoyatda
achinarli holdir. Bu kemtiklik oiladagi kichik munosabatlardan boshlab taʼlim
muassasasidagi muhitgacha, ijtimoiy jarayonlardagi turli
aloqa-aralashuvlargacha bevosita birdek daxldorlik qilmoqda.
Masalan, ayni zamonda aksar oilalar farzandini chet
tilga, xususan, rus tiliga ixtisoslashgan maktablarda o‘qitishni afzal ko‘rishi
oqibatida uyda ham o‘z milliy tiliga chet til so‘zlarini qorishtirib
ishlatishni odatga aylantirib bormoqda. Eng muhimi esa, hali ona tilida to‘liq
tafakkur qila olmaydigan, hayot ostonasiga endi qadam qo‘yib kelayotgan yosh
avlodning nafaqat so‘z boyligida, balki maʼnaviy olamida ham murakkabliklar,
qorishiqlar, ziddiyatlar vujudga kelishiga sabab bo‘lmoqda. Zotan, taʼlim
muassasasida o‘qitiladigan asosiy til adabiy-maʼrifiy manbalar orqali
shakllantiriladi va boyitiladi. Bola ilk tahsildayoq o‘zga millatga mansub
adabiyot namunalaridan bahramand bo‘lar ekan, tabiiy va beixtiyor ravishda uning
ongu shuurida shu millatga xos bo‘lgan tushuncha-eʼtiqodlar shakllanadi.
Keyingi bosqichlarda esa u rivojlanib, takomillashib boraveradi. Natijada esa,
biz butun bir avlodni o‘z milliy g‘ururidan, milliy tafakkuridan
yiroqlashtirib, o‘zga millat ruhiyatiga moslashtirib qo‘yamiz. Bu esa, har
qanday millat uchun eng og‘ir yo‘qotish. Eng jirkanch va dahshatli fojeadir!
Shu o‘rinda, Janubiy Afrika Respublikasidagi
universitetga kiraverishda yozib qo‘yilgan quyidagi jumlalarga eʼtibor
qaratishimiz nihoyatda ahamiyatlidir:
“Har qanday millatni yo‘q qilish uchun atom bombasi
yoki uzoq radiusga taʼsir qiladigan raketalarga hojat yo‘q. Faqat taʼlim sifati
pasaytirilsa va imtihonlarda talabalarga aldash uchun imkoniyat yaratilsa
bas...
Taʼlimning barbod bo‘lishi – millatning kasodga uchrashidir”.
To‘g‘ri, yuqoridagi fikrlar aynan taʼlim sifatiga
aloqador. Ammo biz uni bevosita millat maʼnaviyati, milliy tilga munosabat
bilan ham bemalol qiyoslashimiz mumkin. O‘z milliy tilini yetarli
o‘zlashtirmagan, ona tiliga nisbatan faxr va iftixor hissini tuymagan, o‘z
milliy tilida sevib so‘zlashishni bilmagan avlod maʼnaviyatida, tafakkurida ham
tub burilishlar sodir bo‘ladi. Inson qaysi tilda ko‘p kitob o‘qisa, tahsil
olsa, g‘ayriixtiyoriy ravishda bo‘lsa ham shu til egalarining maʼnaviyatini,
ruhiyatini bevosita o‘zlashtiradi. Ilk o‘rgangan tilida lug‘at zaxirasi
shakllanadi, so‘z boyligi kengayadi, tafakkur tarzi ham shunga moslashadi. Va
alal-oqibat, o‘z milliyligini teran anglolmay, milliyatiga nisbatan muhabbati
sustlashadi. Bu esa, ko‘z o‘ngingda, oddiy va oson usulda millat vakilini
yo‘qotib boradi.
Zotan, biz farzandlarimizni faxr bilan yetaklab
borayotgan chet, yaʼni rus tiliga ixtisoslashgan maktablarda taʼlim sifati va
samaradorligi nisbatan yuqori deb bilamiz. Shuning uchun ham, deyarli barchamiz
kelajagimiz posbonlarining ushbu dargohlarda taʼlim olishidan umidvor va
manfaatdormiz. Lekin masalaning ikkinchi tomoni, asliy mohiyatini ham
eʼtibordan qoldirmasligimiz lozim. Ushbu taʼlim muassasalarida tahsil olayotgan
bugungi yosh avlod nafaqat bizning farzandimiz, naslimiz davomchisi, avvalo,
millatimiz vakili, ajdodlarimiz umidi, Ona Vatanimiz dilbandi ekanligini esa
ko‘pda unutib qo‘yamiz.
Shuning uchun ham, bugun o‘z farzandlarini o‘zga tilli
maktablarda o‘qitishni afzal ko‘rayotgan ota-onalarimizdan oilaviy muhitda
milliylikni ustuvor tutishga, milliy qadriyatlar, xususan, o‘zbek tilining
qadrini tushiradigan holatlarga yo‘l qo‘ymay, aksincha, uning qimmatini
oshirib, yosh avlod qalbida Ona tili, Ona Vatani, milliy maʼnaviyatiga muhabbat
va sadoqatni kuchaytirib tarbiyalash talab etiladi.
Darhaqiqat, ko‘p tilni bilish ko‘p bilim egallashga
qiyoslanishini nazarda tutsak, bu boradagi tanlov, albatta, o‘rinli
hisoblanadi. Inson qancha ko‘p til bilsa, shuncha cheksiz bilim egallab boradi.
O‘zlashtirgan tilida mavjud ilmiy-badiiy adabiyotlarni qiynalmay mutolaaa qila
oladi, bilim doirasini, dunyoqarashini, tafakkur tarzini beqiyos darajada
kengaytirish imkoniga ega bo‘ladi. Bu jihatlarni inkor etish o‘rinsiz.
Aksincha, eʼtirof etish va yosh avlodni milliy ruhda tarbiyalashga yo‘naltirish
asosiy zaruratdir. Zero, inson zamon bilan hamnafas bo‘lish, dunyo kezib, o‘z
tafakkuri va iqtidorini kuchaytirish orqaligina yurt ravnaqi, Vatan rivojiga
munosib hissa qo‘sha olishi mumkin. Buni isteʼdodli shoir Avaz O‘tar ham o‘z
ijodida teran yoritib beradi:
Har tilni biluv emdi bani odama jondur,
Til vositai robitai olamiyondur.
G‘ayri tilini saʼy qiling bilgali, yoshlar
Kim ilmu hunarlar rivoji andin ayondur.
Lozim siza har tilni biluv ona tilidek,
Bilmakka ani g‘ayrat eting, foydali kondur.
Ilmu fan uyiga yuboringlar bolangizni,
Onda o‘quganlar bori yaktoyi jahondur.
Ko‘rinadiki, hamma davrlarda ham ko‘p tilni bilish
ko‘p bilim egallashning muhim vositalaridan sanalgan. Ilm-maʼrifat homiylari,
millat rahnamolari yosh avlodni har jihatdan barkamol etib tarbiyalashda
jahoniy tillarni egallashni, dunyo kezib ilm orttirishni asosiy omillardan
sanab kelishgan va buni butun ijodiy faoliyatlari davomida targ‘ib etishga
urinishgan.
Yana shu o‘rinda mazkur muammodan tashqari, ishlab
chiqarish korxonalari, turli tadbirkorlik obyektlarini nomlash jarayonlarida
ham chet tillardan foylanishga eʼtibor nihoyatda kuchayib borayotganini alohida
taʼkidlab o‘tish lozim. Bu borada, tegishli qonun hujjatlari mavjud bo‘lsa-da,
doimiy tahliliy-tanqidiy o‘rganishlar olib borilib, tegishli mutasaddilar
takror ogohlantirilayotganligiga qaramasdan, natija hali-hanuz qoniqarli
ahvolga kelgani yo‘q. Haqiqiy millat fidoyilari, so‘z ijodkorlari, til
posbonlarigina bu borada nihoyatda kuyunchaklik bilan turli chiqishlar qilib,
o‘z eʼtirozlarini namoyon etib, taklif-tavsiyalarini ilgari surib kelishmoqda.
O‘ylaymizki, yaqin vaqtlar oralig‘ida milliy tilimiz atrofida sodir bo‘layotgan
ushbu og‘riqli masalalar o‘zining ijobiy yechimini topib boradi. Jonajon
xalqimiz o‘zbek tilining milliy qudratini, bepoyon imkoniyatlarini, davlat tili
sifatidagi qadr-qimmatini teran anglab yetadi hamda uning sofligi, taraqqiyoti
yo‘lida birlashadi, soha jonkuyarlarining amaliy faoliyatini
qo‘llab-quvvatlaydi. Natijada esa, ona tilimiz yanada rivojlanib, boyib boradi.
Kelajak avlodimiz qo‘liga ko‘rkam va bezavol taqdim etiladi. Bu borada
yurtimizning har bir fiqarosidan, o‘zbek millatining har bir vakilidan
birdamlik, yakdillik, jonkuyarlik joizdir. Inchunin, buyuk mutafakkir
Alixonto‘ra Sog‘uniy qayd etganidek, “Qaysi bir millatning ona tili o‘z
hojatini o‘tayolmay, boshqa yot tillar oldida mag‘lubiyatga uchrab tiz bukar
ekan, unday millat ko‘p uzoqlamayoq, insoniy huquqlaridan ajragan holda hayot
daftari ustiga inqiroz qalami chekilishi shubhasizdir”.
Biz millatsevar, yurtparvar o‘zbek xalqi esa bunday
dahshatli fojeaga uchrashni zinhor istamaymiz. Milliy tilimizni asrab-avaylab,
yanada rivojlantirish yo‘lida hamisha kamarbastamiz.
Surayyo PO‘LATOVA,
“O‘zbekgidroenergo” aksiyadorlik jamiyati
Boshqaruvi raisining maʼnaviy-maʼrifiy ishlar
va davlat tilini rivojlantirish
masalalari
bo‘yicha maslahatchisi