- Bosh sahifa
- Maslahatchi minbari
- SHARAF VA IFTIXOR MANZILLARI
SHARAF VA IFTIXOR MANZILLARI
Ko‘p ming
yillik tarixiy tajribalar ko‘rsatadiki, o‘z milliy-maʼnaviy qadriyatlariga
tayangan, ularni avaylab-asragan va hayotiy faoliyatida keng qo‘llagan jamiyat
rivojlanish yo‘lida og‘ishmay davom etadi, taraqqiyotning barcha pog‘onalarini
mardonavor bosib o‘ta oladi. Bu jihatdan, O‘zbekiston xalqi
ham o‘zining boy va barqaror amaliy yutuqlariga ega. Xususan, so‘nggi yillarda
milliy anʼanalar, maʼnaviy meros, ayniqsa, davlat tilini keng targ‘ib etish va
amalda qo‘llash borasida shu qadar keng qamrovli islohotlar olib borilmoqdaki,
bu jarayonlarda davlatimiz rahbari eng faol tashabbuskor sifatida barchaga
namuna bo‘layotganini alohida eʼtirof etish o‘rinlidir.
Yanada quvonchli jihatlardan biri shuki, Yurtboshimiz dunyoning eng yirik
xalqaro tashkilotlari yig‘inlarida jahon minbaridan turib, o‘z fikrlarini,
g‘oya va tashabbuslarini jonajon ona tilimizda bayon qilmoqda. O‘tgan 2020-yildagi Birlashgan Millatlar Tashkiloti Bosh Assambleyasining 75-yubiley
sessiyasida hamda kuni kecha bo‘lib o‘tgan BMT Inson huquqlari bo‘yicha
kengashining 46-sessiyasida ham Prezidentimiz yuksak minbardan turib, o‘zbek
tilida nutq so‘zladi.
O‘zbekiston joriy yilda Inson huquqlari bo‘yicha kengash aʼzosi sifatida
mazkur nufuzli anjumanda ilk bor qatnashayotgan bo‘lsa ham, davlatimiz rahbari
barcha fikr-mulohaza va takliflarini o‘zbek tilida ifodalab, milliy
davlatchiligimiz timsollariga hurmat va eʼtiborini yana bir bor keng jahon
oynasidan namoyish qildi.
Davlatimiz rahbari ushbu sessiyadagi maʼruzasida O‘zbekiston Birlashgan
Millatlar Tashkilotining “Inson huquqlari yo‘lida harakatga daʼvat” tashabbusini ilgari surish uchun Kengash aʼzolari va barcha sheriklar bilan
yaqin hamkorlikda faoliyat olib borishini taʼkidlab, yurtimizda demokratik
o‘zgarishlarni yanada chuqurlashtirish hamda O‘zbekistonning Kengash
doirasidagi faoliyatining ustuvor yo‘nalishlari to‘g‘risida atroflicha
tushuntirish berib o‘tdi. Mazkur yo‘nalishlar xalqimizning tub manfaatlarini
himoya qilish, tinchlik va farovonlikni taʼminlash, insoniy qadr-qimmatni yuksaltirishga
qaratilganligi bilan eʼtiborlidir.
Darhaqiqat, yangi O‘zbekistonni bunyod etish yo‘lidagi islohotlarning
dastlabki qatorida “insonning asosiy huquq va erkinliklarini taʼminlash” masalasi
muhim o‘rin tutmoqda. Ushbu yo‘nalishdagi maqsadlar Inson huquqlari bo‘yicha milliy strategiyaga muvofiq ravishda “hech
kimni eʼtibordan chetda qoldirmaslik” tamoyili asosida amalga
oshirilib borilmoqda.
Shuningdek, yurtimizda olib borilayotgan “Gender siyosati
masalalari borasida mamlakatimizning ijtimoiy-siyosiy hayotida va
ishbilarmonlik sohasida ayollarning rolini tubdan oshirishga qaratilgan
ishlar” hamda bugungi kunda “aholimizning yarmidan ko‘pini tashkil
etayotgan yoshlar huquqlarini himoya qilish” masalalaridagi samarali
islohotlar ham bu boradagi faoliyatning muhim ustuvor jihatlarini ko‘rsatadi.
Shu o‘rinda taʼkidlash lozimki, davlatimiz rahbari ushbu anjumandagi
nutqida joriy yil O‘zbekistonda “Yoshlarni
qo‘llab-quvvatlash va aholi salomatligini mustahkamlash yili” deb eʼlon
qilinganiga ham alohida to‘xtalib o‘tdi va “Birlashgan Millatlar
Tashkiloti shafeligida Yoshlar huquqlari bo‘yicha butunjahon konferensiyasini
o‘tkazish; BMT Iqtisodiy va ijtimoiy kengashining o‘ninchi forumida Yoshlar
huquqlari to‘g‘risidagi konvensiya loyihasini taqdim etish; shuningdek, Yoshlar
huquqlari bo‘yicha maxsus maʼruzachi institutini taʼsis etish masalasini
kiritish” borasidagi taklif-tashabbuslarini ham ilgari surdi.
Mazkur nutq o‘z teran maʼno-mohiyati, ulug‘vor g‘oya va maqsadlari bilan
anjuman ishtirokchilari hamda keng jamoatchilik eʼtiborini qozondi. Shu
jihatdan, O‘zbekistonning dunyo hamjamiyatidagi maqomi va nufuzining ortishiga
munosib hissa bo‘lib qo‘shildi. Nafaqat xalqimiz, butun dunyodagi o‘zbek tilida
so‘zlashuvchilar, o‘zbek tilini sevuvchilar qalbiga so‘nmas faxr va ishonch
baxsh etdi.
Darhaqiqat, insonning o‘z Vataniga muhabbat va sadoqati, avvalo,
milliy-maʼnaviy qadriyatlariga hurmat va eʼtibori orqali kamolga yetadi.
Vatanni, millatni sevish – uning azaliy insoniy qadriyatlari, davlatchilik
timsollarini sevish va ardoqlash demakdir. Ayni jihatdan, davlatimiz rahbari
butun xalqimizga munosib o‘rnak va chinakam rahnamo bo‘layotgani barchamiz
uchun sharaflidir.
Surayyo Po‘latova,
“O‘zbekgidroenergo” AJ
boshqaruvi raisining maslahatchisi