- Bosh sahifa
- Maslahatchi minbari
- Harfimiz dumlimi yoki... balki u yersiz qolgandir, ersiz emas
Harfimiz dumlimi yoki... balki u yersiz qolgandir, ersiz emas
Xalqimizda o‘ynab gapirsang ham o‘ylab gapir, -degan naql bor. Albatta
bu suyaksiz tilni bo‘sh qo‘ysang, u nimalar demaydi. Shuning uchun keksalar
tilga emas, aqlga ishora qilginda bolam, deyishadi.
Ammo
keyingi vaqtda ayrim kishilarning “Mening ham fikrim bor”, qabilida ish tutib,
taklif bahonasida xalq mulkiga daxldor, ming yillik sinovlardan o‘tgan tilimiz,
alifbomiz haqida bo‘lar-bo‘lmas takliflarni o‘rtaga tashlashayotgani kishini
ajablantiradi, chuqur o‘yga toldiradi.
Yaqinda ijtimoiy tarmoqlarda h harfi bilan x harfini (ularning tilida yumshoq h va qattiq x ni) bitta harfga aylantirish taklifini bildirishdi. Avval bu harflarni farqlab olinglar baraka topgurlar, deging keladi. Ular qattiq yoki yumshoq harflar emas, undosh harflar. Biri xayr so‘zida ishlatiladigan x harfi va ikkinchisi hayo so‘zida qo‘llaydiganimiz h harfi. Ular so‘zlashayotganda qattiq va yumshoq talaffuz qilinadi xolos.
Bir
zamonlar q harfining dumini kesib tashlash haqida bo‘lgan bahslar haqida
shunday gaplar yurardi. Shu fikrni taklif qilganlarga siz avtobusga chiqdingiz.
Uning tiqilinchligi sabab siqilganingizdan tushib ketdingiz. Ana endi bu
holatni dumi qirqilgan q bilan aytinglarchi deganida, “dumlarini qisib
qolishgan ekan”,-deb eshitganmiz.
Hozirgi
taklif bo‘yicha ularga savol beramiz:
Aytinglarchi ix-ix bilan ih-ihni, ux-ux bilan uh-uhni va oh -oh bilan
ox-oxning qanday farqi bor?
Albatta
hammasini x da, yoki biri dumli, boshqasi dumsizda deyishingiz tabiiy.
Lekin, eshakka o‘tirib ix, ix desangiz u yuradi, ih, ih desangiz eshak
kulolmaydiyu, lekin eshitgan odamlar kuladi. Nima bo‘ldi aka, biron joyingiz
og‘rimayaptimi, deyishi ham mumkin. Nahotki ih, ih, ih deb ingrangan
kasallarning ovozini eshitmagan bo‘lsangizlar.
Bunday
ih, ihlashdan hatto eshak ham sekinlaydi. Eshak ovozni farqlaydiyu, nahot odam
farqlamasa.
Yoki
ux, uxni va uh-uhni olaylik. Ux degani hayratni, uh degani esa charchoqni bildiradi.
Xuddi
shular qatori oh bilan oxning ham farqi katta.
Oh-oh na sanam
buncha go‘zal san-na ajoyib.(qo‘shiq matnidan)
Oh-oh buncha shirin degan maqtovga yo‘g‘rilgan taʼriflarimizchi?.
Yoki
o-o-oh, vo-o-oh deb og‘riqdan qattiq ingranib azoblanganimizni bildirishimizchi.
Ox-ox
esa butunlay boshqa. Ox-ox bu kakirmoq. Kattiq tuflashni anglatadi. O-o-ox tuf.
O-o-oh tufmas.
Xol
bilan holni oling. Xol bu kishi yuzidagi yoki tanasidagi xollar. Xoli ko‘p
odamni Xolbobo yoki Xolmat deymiz.
Hol
esa holimiz, holatimiz, yaʼni ahvolimizni bildiradi. Falonchining mazasi
yo‘qroq ekan, hol-ahvol so‘radingmi, yaxshi bo‘lib qolibdimi, -deb
bir-birimizdan hol so‘raymiz.
Xola
bilan xohlani olaylik. Xola desak xolamiz qaraydi. Xohla uni ol, xohla bun ol
yozilishda shunday bo‘lsa-da aytilishda hola uni ol. Hola buni ol deb
eshitiladi.Bu tanla degan maʼnoni anglatadi.
Xurofot
so‘zini olaylik. Bu bilimsizlik, qoloqlik, bidʼat, zalolat maʼnolarini beradi.
Endi uni hurofot deb yozsak, so‘zni farqlovchilar xatoligini darrov anglaydi.
Ammo bu so‘z o‘qib eshittirilganda eshitgan kishi “Nima balo hurlik qachondan
buyon ofat bo‘lib qoldi” deb o‘qiyotgan kishidan xafa bo‘lishi tayin.
Agar gapni “Holiga voy bo‘ldi” desak, bu kimningdir ahvoli
yomonlashganini anglatadi. Xoliga voy bo‘ldi desakchi, qanday qilib degan savol
tug‘iladi. Yuzidagi xoli qanday voy bo‘lishi mumkin.
O‘t
bilan o‘ynashmoq xavfli, degan gap ular aytmoqchi yumshoq h bilan yozilsa, o‘t
bilan o‘ynashmoq havfli bo‘ladi. Bora bora avfli bo‘lib qolishi hech gapmas.
Balki
keyinchalik bundaylar “ye” harfi bilan “e” harflariniyam bitta qilish taklifi
bilan chiqishar. Agar mabodo shunday bo‘lsa, u yersiz qoldi, bu esa ersiz
qoldi, nima farqi bor deyishsayam ajablanmasa bo‘ladi.
Xullas
arablar s va z harflarining 3-4 tadan, kavkazliklar q harfining 5-6 tadan
shaklarini farqlaganda, biz x va h ni farqlay olmasak uyat bo‘larov. Yoki
xitoylikr 20 mingdan ortiq iyeroglifni yodlashni eplaganda bular nima degan
gap, aziz va hurmatli yurtdoshlar, millatdoshlar. Axir bizning tilimizdan oson,
qulay, chiroyli va go‘zal tilni qayerdan topasiz.
Tilimizni
asraylik avaylaylik. 4-5 ta “dumli” yoki “dumsiz”ni deb, o‘zimiz ham dumbulga
aylanib qolmaylik.
Shuhrat
Ro‘ziyev,
Mahalla va oilani qo‘llab-quvatlash vazirining maslahatchisi
"Yangi O'zbekiston" gazetasidan olindi