- Bosh sahifa
- Yangiliklar
- O‘ZBEK TILI JONKUYARI
O‘ZBEK TILI JONKUYARI
O‘zbekistonda
lingvopoetikaga doir tadqiqotlarni boshlab bergan, shuningdek terminologiya,
nutq madaniyati, o‘zbek tili o‘qitish metodikasi kabi muhim sohalarini
rivojlantirishga yangicha yondashib, ko‘p yillardan buyon filolog
tayyorlashning istiqboli sifatida til va adabiyotni qo‘shib o‘qitish
Konsepsiyasini ishlab chiqqan va amaliyotga joriy qilayotgan, men kabi ko‘plab
tadqiqotchilarni ilm yo‘liga olib kirgan, muhim va jamiyat uchun nihoyatda zarur,
amaliy ahamiyatga ega ilmiy faoliyatga yo‘naltirgan olim - professor Ibodulla
Kamolovich Mirzayev ko‘p yillardan buyon davlat tilini rivojlantirish, uning
jamiyatdagi nufuzini oshirish bo‘yicha keng ko‘lamli ilmiy-metodik ishlar bilan
shug‘illanib keladi.
Ustozning yana bir
o‘ziga xos xususiyati shundaki, u kishi o‘nga yaqin tillarni biladigan,
jumladan, fransuz, ingliz va rus tillarini mukammal o‘zlashtirgan, mazkur
tillarda yozilgan filologiya, xususan, tilshunoslikka doir muhim xorijiy ilmiy
adabiyotlarni ona tilimizga mahorat bilan tarjima qilib berayotgan poliglot
olim hamdir.
Ayniqsa, I.Mirzayevning
jahon tilshunosligida mashhur bo‘lgan Gakkning "Nazariy grammatika",
Ferdinan do‘ Sossyurning “Assimetriya”ga doir asarlarini, shuningdek,
Bertelsning "Navoiy va Jomiy", M.Maslovaning "Kognitiv
tilshunoslik" monografiyalarini rus tilidan o‘zbek tiliga tarjima
qilgannini tilshunos va adabiyotshunos olimlarimiz, tadqiqotchilar yaxshi
biladi. Olim
Samarqand davlat universitetida oldindan davlat tilining mavqeyi haqida
qayg‘urib keladi. I.Mirzayev tashkil qilgan "Amaliy tilshunoslik, o‘zbek
tili va adabiyot o‘qitish metodikasi" kafedrasi universitetda o‘zbek
tilini ona tili va davlat tili sifatida o‘qitishda samarali natijalarni qo‘lga
kiritib kelmoqda. Professor I.Mirzayev o‘zbek tilshunosligida o‘z so‘ziga ega
sermahsul, jonkuyar va qattiqqo‘l olimdir. O‘zbek tili o‘qitish metodikasini
takomillashtirishga doir bir qator original takliflar va ishlanmalar
muallifidir. Ayniqsa, tahliliy o‘qish orqali filolog-mutaxassis, o‘qituvchi
tayyorlash metodikasi bugun Davlat tilini rivojlantirish konsepsiyasiga mos
keladi, uning ijrosini taʼminlashga xizmat qiladi. Ustozimning umrlari uzoq va
yanada mazmunli bo‘lsin!
G‘ofir
Hamroyev,
Pedagogika fanlari bo‘yicha falsafa doktori