- Bosh sahifa
- Yangiliklar
- Adabiy tanlovlarning g‘oliblari taqdirlandi
Adabiy tanlovlarning g‘oliblari taqdirlandi
O‘zbekiston Respublikasi
Prezidentining tegishli qarorlarida “Abdulla Oripov izdoshlari”, "O‘tkir
Hoshimov asarlari bilimdoni” ko‘rik-tanlovlarining tuman-shahar, viloyat va
Respublika bosqichlarini tashkil etish belgilangan edi.
Shu munosabat bilan O‘zbekiston Yozuvchilar uyushmasi Xalq ta’limi vazirligi, Prezident ta’lim muassasalari agentligi, Respublika Ma’naviyat va ma’rifat markazi bilan hamkorlikda ko‘rik-tanlovlarning tuman va shahar, viloyat bosqichlarini o‘tkazdi.
O‘zbekiston
Yozuvchilar uyushmasi axborot xizmati ma’lumotiga ko‘ra, 2021 yil aprel
oyida Respublikamizdagi 206 ta tuman va shaharda tanlovlarning birinchi
bosqichi o‘tkazildi. Mamlakatimizdagi 9000 ga yaqin maktab mazkur tanlovlarga
jalb etildi. Tanlovning viloyat bosqichiga har bir tuman va shahardan 2 nafar
g‘olib yo‘l olishdi.
Tadbirda O‘zbekiston Yoo‘uvchilar uyushmasi raisi, xalq shoiri Sirojiddin Sayyid va boshqalar mamlakatimizda milliy adabiyotimizni ravnaq toptirish, kitobxonlik rivojiga alohida rag‘bat va e’tibor ko‘rsatish, ustoz yozuvchi va shoirlarning ijodini mukammal o‘rganish masalasi doimiy e’tiborda ekanini ta’kidladi.
Mazkur tanlovda
yurtimiz o‘quvchi-yoshlari g‘oyat faol qatnashgani ularning kitobga,
adabiyotimizga bo‘lgan e’tibori , mehri va ixlosi tobora ortib borayotganining
yana bir amaliy ifodasidir. Tanlov jarayonida atoqli adiblar nomi bilan
ataluvchi ijod maktablaridan ham viloyat bosqichiga bir nafardan
ishtirokchi yo‘llanmani qo‘lga kiritdi.
Tanlovning viloyat bosqichi may oyining ikkinchi yarmida
Qoraqalpog‘iston Respublikasi, viloyatlarda bo‘lib o‘tdi. “Abdulla Oripov
izdoshlari” ko‘rik-tanlovi bo‘yicha bir nafar, “O‘tkir Hoshimov asarlari
bilimdoni” ko‘rik-tanlovi bo‘yicha bir nafar, atoqli adiblar nomi bilan
ataluvchi ijod maktablaridan ham xuddi shunday ikki nafardan, jami Respublika
bosqichiga 46 nafar ishtirokchi yetib keldi.
Tanlovlarning respublika bosqichi ham adabiyot, she’riyat, nafosat bayrami tarzida bo‘lib o‘tdi.
Mazkur tanlovning
respublika bosqichi ishtirokchilarini saralash uchun tanlov komissiyasi
tomonidan viktorina savollari to‘planib, shu orqali ishtirokchilarning
bilimlari sinovdan o‘tkazildi. Faxrli o‘rin sohiblariga O‘zbekiston Yozuvchilar
uyushmasining qimmatbaho sovg‘alari va diplomlar topshirildi. Tanlov
ishtirokchilarining barchasiga uyushma tomonidan chop etilgan kitoblar
jamlanmasi taqdim etildi. Aslida bu tanlovda ishtirok etgan barcha o‘quvchilar
g‘olibdir. Negaki, ular o‘z bilimi, iqtidori, izlanishini adabiy jamoatchilikka
namoyish etishga, o‘z ustida yanada ko‘proq ishlash va izlanishga astoydil ahd qilgani
diqqatga sazovordir.
Nazokat Usmonova, O‘zA
uza.uz