- Bosh sahifa
- Yangiliklar
- Davlat tili amal qilishini rivojlantirish yo‘lida
Davlat tili amal qilishini rivojlantirish yo‘lida
O‘zbek
tilini davlat tili sifatida mamlakatimiz miqyosida, barcha sohalarda
rivojlantirishga katta eʼtibor qaratilib, bu sohada xalqimizga, qolaversa,
tilimiz fidoyilari, jonkuyarlari, barcha mutaxassislariga keng imkoniyatlar
yaratildi.
Prezidentimizning
2019 yil 21 oktyabrdagi “O‘zbek tilining davlat tili sifatidagi nufuzi va
mavqeini tubdan oshirish chora-tadbirlari to‘g‘risida”gi hamda uning ijrosini
taʼminlash yuzasidan Vazirlar Mahkamasining qarori qabul qilindi.
Mamlakatimizda
21 oktyabr O‘zbek tili bayrami kuni deb eʼlon qilinganligi, 2020-2030 yillarda
davlat tilini rivojlantirishga qaratilgan konsepsiya va davlat dasturi ishlab
chiqilayotgani, “Davlat tili haqida”gi qonun bugungi kun talablaridan kelib
chiqqan holda yangi tahrirda tayyorlangani va bu boradagi ishlarimiz tizimli va
aniq reja asosida olib borilayotgani ona tilimizga bo‘layotgan
munosabatimizning yorqin isbotidir. Davlat tilining mavqei hamda rivojiga
davlatimiz rahbari tomonidan qaratilayotgan alohida eʼtibor va nazorat
quvonarli hol, albatta.
Bugun
Vazirlar Mahkamasi apparatining tarkibiy bo‘linmasi sifatida faoliyat
yuritayotgan Davlat tilini rivojlantirish departamenti ham Prezidentimiz
tashabbusi asosida tashkil etilgan bo‘lib, uning zimmasidagi vazifalar
yuqoridagi ikki hujjatda, shu bilan birga, 2019 yil 12 dekabrda tasdiqlangan
Davlat tilini rivojlantirish departamenti to‘g‘risidagi nizomda qatʼiy belgilab
qo‘yilgan. Departament o‘z faoliyatini vazirliklar, davlat qo‘mitalari va
davlat boshqaruvi organlari, mahalliy ijroiya hokimiyati organlari, shuningdek,
boshqa tashkilotlar bilan o‘zaro hamkorlikda amalga oshiradi. Hozirgi vaqtgacha
departament tomonidan butun respublikada davlat tilining amal qilishi bilan
bog‘liq muammolar izchil o‘rganilib, ularning yechimlari yuzasidan zarur
chora-tadbirlar ishlab chiqildi. Davlat tilini rivojlantirish, davlat tili
to‘g‘risidagi qonun hujjatlariga rioya etilishi ustidan monitoring olib
borilishi yo‘lga qo‘yildi. Ushbu sohada jamoatchilik nazoratining samarali
shakllarini joriy etish bo‘yicha chora-tadbirlar ishlab chiqildi va tegishli
ishlar bajarilmoqda.
Vazirlar
Mahkamasining 2020 yil 20 yanvardagi “Mamlakatda davlat tilida ish yuritishni
samarali tashkil etish to‘g‘risida”gi qarorida davlat bosh qaruvi organlari,
xo‘jalik birlashmalari rahbarlari, Qoraqalpog‘iston Respublikasi Vazirlar
Kengashi Raisi, viloyatlar va Toshkent shahri, tuman (shahar) hokimlari davlat
tili to‘g‘risidagi qonun hujjatlari talablariga so‘zsiz rioya qilish, ish
yuritishni davlat tilida tashkil etishga shaxsan masʼul ekanligi belgilab
qo‘yilgan.
Qaror bilan
rahbarning maʼnaviy-maʼrifiy ishlar samaradorligini oshirish, davlat tili
to‘g‘risidagi qonun hujjatlariga rioya etilishini taʼminlash masalalari
bo‘yicha maslahatchi lavozimi joriy etildi. Bugungi kunda hokimliklar, vazirlik
va idoralarda ushbu lavozimda 300 nafarga yaqin mutaxassis ish boshladi.
Maslahatchilar zimmasidagi vazifalar ham qarorda belgilab qo‘yilgan. Vazirlar
Mahkamasi huzurida turli soha vakillari, shuningdek, tilshunos olimlardan
iborat 49 kishilik tarkibda Atamalar komissiyasi tuzildi. Komissiyaning asosiy
vazifalari, huquq va majburiyatlari Atamalar komissiyasi to‘g‘risidagi nizom
bilan tasdiqlab qo‘yilgan. Nizomda komissiyaning ilmiy asoslangan yangi so‘z va
atamalarni rasmiy isteʼmolga kiritish, normativ-huquqiy hujjatlar loyihalarida
adabiy til qoidalari va normalariga, shuningdek, yuridik, texnik va boshqa
maxsus qoidalarga rioya etilishini taʼminlash, o‘zbek tiliga kirib kelayotgan
yangi atamalarni qonun hujjatlariga joriy etish va amalda qo‘llashning huquqiy
muammolarini o‘rganish, ushbu sohadagi munosabatlarni huquqiy tartibga
solishning rivojlanish yo‘nalishlarini aniqlash, vazirliklar, davlat
qo‘mitalari va idoralarga atamashunoslik masalalari bo‘yicha maslahat berish
kabi qator vazifalarni bajarishi, shuningdek, uning huquq va majburiyatlari
belgilab berilgan.
Tilimizning
amalda — ham og‘zaki, ham yozma, rasmiy va boshqa uslublarda keng qo‘llanishini
yo‘lga qo‘yish, bunda barcha zaruriy choralarni qo‘llash, sohaning yetuk
mutaxassislarini tayyorlashda katta bazamiz mavjud. Bu, shubhasiz, Alisher
Navoiy nomidagi Toshkent davlat o‘zbek tili va adabiyoti universitetidir. Bugun
mazkur universitetda o‘zbek tili va adabiyoti fani o‘qituvchilari, tarjimonlar,
noshirlar tayyorlash bilan birga, oliy adabiyot kursi tinglovchilari tahsil
oladilar. Universitetda tilshunoslik, til tarixi, adabiyotshunoslik,
tarjimachilik, noshirlik ishlarini to‘g‘ri tashkil etish kabi sohalarda ilmiy
tadqiqotlar o‘tkazilmoqda. Bugungi globallashuv sharoitida o‘z tilimizning
boshqa tillar taʼsirida o‘zgarib ketmasligi, gavhardek qimmatli durdona
so‘zlarni yo‘qotib qo‘ymasligi uchun ushbu universitetning faoliyatini yana-da
kengaytirishga ehtiyoj sezildi. Taʼlim muassasasining hayotida o‘zbek tilining
o‘rnini kuchaytirish va xalqaro miqyosdagi obro‘-eʼtiborini mustahkamlash
borasidagi faoliyatini yana-da takomillashtirish maqsadida Vazirlar Mahkamasi
yana bir qaror qabul qildi. 2020 yil 3 mart kuni tasdiqlangan ushbu qaror bilan
Alisher Navoiy nomidagi Toshkent davlat o‘zbek tili va adabiyoti universiteti
oliy taʼlim muassasalarida o‘zbek tili va adabiyotini o‘qitish metodikasini
takomillashtirish, o‘zbek tili o‘qituvchilarining malakasini oshirish, ilmiy
tadqiqotlar olib borish, davlat tilida ish yuritish asoslarini o‘qitish va
malaka oshirish hamda atamashunoslik bo‘yicha tayanch oliy taʼlim muassasasi
etib belgilandi. Universitet negizida butun respublikadagi oliy o‘quv
dargohlarida o‘z bo‘linmalariga ega bo‘lgan Davlat tilida ish yuritish
asoslarini o‘qitish va malaka oshirish markazi tashkil etildi.
Markaz hamda
uning Qoraqalpog‘iston Respublikasi va barcha viloyatlar markazlarida tashkil
etilgan 13 ta filialida davlat tashkilotlari xodimlari uchun lotin yozuviga
asoslangan o‘zbek yozuvi, o‘zbek adabiy tili meʼyorlari, davlat tilida ish
yuritish asoslari bo‘yicha malaka oshirish kurslari tashkil etiladi.
Markazda
davlat tashkilotlari xodimlari tashkiliy, farmoyish, maʼlumot-axborot
hujjatlari, xizmat va diplomatik yozishmalarni, aholi esa faqat kundalik
hayotda faol qo‘llanadigan maʼlumot-axborot hujjatlarini o‘rganadi.
Unda
pedagoglar va tinglovchilar hamkorligida o‘quv loyihalari, keys-stadilar
tayyorlanadi. Bu o‘quv mahsulotlari amaliy o‘zbek tilini egallashni
takomillashtirish, o‘zbek tili funksional qamrovining kengayishi, o‘zbek tilida
ish yuritish uslubini takomillashtirish bilan birga, davlat tili taʼlimida fan
— taʼlim — ishlab chiqarish uzviyligini qaror toptirishga ham xizmat qiladi.
Amaliy
vazifalar aniq o‘z ifodasini topgan, bu sohada xizmat qilayotgan mutaxassislar
zimmasiga jiddiy vazifalar yuklaydigan qarorlardan biri Vazirlar Mahkamasining
2020 yil 11 martdagi “O‘zbek tili va adabiyoti bo‘yicha fundamental va amaliy
tadqiqotlar samaradorligini yana-da oshirish chora-tadbirlari to‘g‘risida”gi
qarori bo‘ldi. Unda O‘zbekiston Fanlar akademiyasi, O‘zbekiston Yozuvchilar
uyushmasi va boshqa tashkilotlarning O‘zbekiston Fanlar akademiyasi O‘zbek
tili, adabiyoti va folklori instituti tuzilmasida besh shtat birligida
sotsiolingvistika bo‘limini tashkil etish to‘g‘risidagi takliflari maʼqullanib,
bo‘limning vazifalari belgilab berilgan. Bo‘lim o‘zbek tilining tabiati,
ijtimoiy munosabatlardagi o‘rni, vazifalari, ijtimoiy munosabatlarning tilga
taʼsiri, tilimiz bilan bog‘liq muammolarni o‘rganib, ilmiy-nazariy jihatdan tatbiq
etadi. Tilimizning takomili yo‘lida asosli, teran negizli tadqiqotlar, amaliy
va innovatsion tajribalarni amalga oshiradi, sohadagi ilmiy izlanishlarni
kuchaytiradi. Izohli va boshqa lug‘atlar, davlat tilida ish yuritish bo‘yicha
qo‘llanma va adabiyotlar tayyorlaydi. Bugungi kunda izohli lug‘atni
mukammallashtirish nechog‘liq muhim bo‘lsa, kitobning o‘zi barcha tashkilotlar
uchun shu darajada zarur.
Davlat tilini rivojlantirish departamenti
tomonidan sotsiolingvistika bo‘limi zimmasiga muhim vazifalar yuklangan. Eng
dolzarb vazifalardan biri bu o‘zbek tilining mavjud imlo qoidalarini
mukammallashtirishdir.
Xalqaro
atama elementlari bugungi globallashuv davrida keng quloch yoygan. Biroq
zimmasida davlat tilida ish olib borish, hujjatlarni aniq va to‘g‘ri yuritish
vazifalari bo‘lgan rahbarlar, xodimlarning xalqaro atamalar bilan tanish
emasligi juda ayanchlidir. Shu bois, xalqaro atamalar lug‘ati yaqin vaqtda,
2020 yilning III choragida chop etilishi rejalashtirilgan. Shu bilan birga,
ijtimoiy siyosiy atamalar, turli fan sohalari atamalari, o‘zbek tili maʼnodosh
so‘zlari, frazeologizmlari izohli lug‘atlarini mukammallashtirish bugungi kunda
eng zaruriy vazifalardan biri bo‘lib bormoqda.
Mavjud
tajribalardan kelib chiqib, lug‘atlarni tuzuvchi ishchi guruhlarni tashkil
etishda avval shu turdagi lug‘atlarga mualliflik, hammualliflik qilgan
tajribali olimlar jalb etilishi ko‘zda tutilgan. Lug‘atlarni
mukammallashtirish, ularda xalqimiz ilmiy, maʼrifiy va badiiy tafakkurining
bebaho mahsuli bo‘lgan ona tilimizdagi barcha so‘zlar, barqaror birikmalarni
qamrab olish eng muhim mezon sifatida belgilab berilgan.
Qaror
ilovasida O‘zbekiston Fanlar akademiyasining 2020-2022 yillarda o‘zbek tili va
adabiyotiga doir fundamental va amaliy tadqiqotlarni amalga oshirish chora-tadbirlari
keltirilgan. Unga ko‘ra, yangilanib, to‘ldiriladigan, qayta ishlanadigan
lug‘atlarning barchasi o‘zbek tilini rivojlantirish jamg‘armasi tomonidan chop
etilishi rejalashtirilgan.
2020 yil 9
mart kuni O‘zbekiston Respublikasi Bosh vaziri rahbarligida va Vazirlar
Mahkamasining kotibiyat mudirlari, vazirlik va idoralar rahbarlari,
Qoraqalpog‘iston Respublikasi Vazirlar Kengashi raisi, Toshkent shahri,
viloyatlar, tuman va shahar hokimlari ishtirokida kengaytirilgan videoselektor
yig‘ilishida respublikamizdagi geografik obyektlarning nomlarini, shuning dek,
jamoat joylari, ko‘chalar, binolar peshtoqidagi turli lavha va reklamalarning
qonun hujjatlari talablariga muvofiqlashtirilishi masalalari atroflicha va
tanqidiy ravishda ko‘rib chiqildi va bu sohada amalga oshirilishi lozim bo‘lgan
vazifalar belgilab olindi.
Bu ayni
muddaodir. Sababi, xalqimizning ko‘plab eʼtirozlari reklamalarga nisbatan
bo‘lib, biz ushbu huquqiy asos bilan muayyan muddatda reklamalarda davlat
tiliga eʼtiborning kuchaytirilishiga erishamiz.
Endi
tilimizning rivoji uchun sarmoya ham bor. Chunki Vazirlar Mahkamasining 2020
yil 10 fevraldagi “O‘zbekiston Respublikasi Vazirlar Mahkamasi huzurida O‘zbek
tilini rivojlantirish jamg‘armasining faoliyatini tashkil etish to‘g‘risida”gi
qarori bilan jamg‘arma tashkil etilgan. Mazkur jamg‘arma mablag‘lari o‘zbek
tilini rivojlantirish bo‘yicha tashabbuslarni qo‘llab-quvvatlash, o‘zbek tilini
rivojlantirish lo yihalariga turli grantlar ajratishga, o‘zbek tilini
rivojlantirish bo‘yicha kitoblar, qo‘llanmalar, lug‘atlar va boshqa kitob
mahsulotlari chiqarishga hamda ilmiy tadqiqotlarni, shuningdek, tilimizni
rivojlantirishga oid mediamahsulotlar, kompyuter dasturlari, mobil ilovalar va
boshqa elektron materiallarni tayyorlash ishlarini qo‘llab-quvvatlashga
sarflanadi. Bundan tashqari, jamg‘arma o‘zbek tilining xalqaro mavqeini
mustahkamlash maqsadida davlat tilidagi materiallarni xorijda istiqomat
qiluvchi vatandoshlarga va xorijiy mamlakatlardagi o‘zbek tilini o‘rgatish
markazlariga yetkazib berishdek xayrli ishlarda ham ishtirok etadi.
Ushbu
masʼuliyatli vazifalarni ijro etishda har bir yurtdoshimiz bizga yelkadosh
bo‘lsa, millatimizning maʼnaviy belbog‘i bo‘lgan ona tilimizning takomili,
uning dunyo hamjamiyatida yana-da mustahkam mavqe tutishiga, albatta,
erishamiz.
Abdug‘affor
QIRG‘IZBOYEV,
Vazirlar
Mahkamasining Davlat tilini rivojlantirish departamenti mudiri, professor