- Bosh sahifa
- Yangiliklar
- O‘zbek tili va adabiyoti bo‘yicha Xalqaro olimpiada boshlandi
O‘zbek tili va adabiyoti bo‘yicha Xalqaro olimpiada boshlandi
O‘zbekiston
Respublikasi Oliy va o‘rta maxsus ta’lim vazirligi tomonidan Alisher Navoiy
nomidagi Toshkent davlat o‘zbek tili va adabiyoti universiteti bilan
hamkorlikda O‘zbek tili va adabiyoti fanidan xalqaro olimpiada tashkil etildi.
So‘nggi
yillarda mamlakatimizda va xalqaro miqyosda o‘zbek tilining nufuzi tobora
yuksalmoqda. O‘zbek tilining jamiyatimizda keng qo‘llanilishi bilan bir qatorda
xorijlik fuqarolar tomonidan o‘zbek tilini o‘rganishga qiziqish ortib bormoqda.
Bugungi
kunda dunyoning 60 dan ortiq universitetlari va markazlarida o‘zbek tili
kurslari faoliyat olib bormoqda. Ushbu markazlarni o‘zbekistonlik
professor-o‘qituvchilar tomonidan yaratilgan o‘zbek tilini o‘rganishga oid
adabiyotlar bilan ta’minlash tizimi yo‘lga qo‘yilgan.
Prezidentimizning 2021-yil 20-oktabrdagi “Mamlakatimizda o‘zbek tilini yanada rivojlantirish va til siyosatini takomillashtirish chora-tadbirlari to‘g‘risida”gi farmoni bu boradagi ishlarni yanada yangi bosqichga olib chiqmoqda.
Mazkur
farmon bilan tasdiqlangan “2020-2030-yillarda o‘zbek tilini rivojlantirish va
til siyosatini takomillashtirish konsepsiyasini 2020-2022-yillarda amalga
oshirish dasturi” ijrosini ta’minlashga katta e’tibor qaratilmoqda.
Shuningdek, o‘zbek tilining xalqimiz ijtimoiy hayotida va xalqaro miqyosdagi
obro‘-e’tiborini yuksaltirish, fan va ta’limdagi hamkorlikni kuchaytirish
orqali chet ellik yoshlarning o‘zbek tiliga bo‘lgan qiziqishini oshirish va
ularni qo‘llab-quvvatlash maqsadida talabalar o‘rtasida O‘zbek tili va
adabiyoti bo‘yicha Xalqaro fan olimpiadasini o‘tkazish yo‘lga qo‘yildi.
Olimpiadada
xorijiy va mamlakatimizdagi oliy ta’lim muassasalarida tahsil olayotgan chet
davlat fuqarosi bo‘lgan (millati o‘zbek bo‘lmagan) bakalavr bosqichi talabalari
ishtirok etmoqda.
Olimpiada
har yili o‘tkazilishi belgilangan. Bu yilgi Xalqaro olimpiadaga 10 ga yaqin
davlatdan 45 nafar chet ellik talabgorlardan arizalar kelib tushganligi
quvonarli. Jumladan, Janubiy Koreya, Rossiya, Turkiya, Afg‘oniston,
Qozog‘iston, Tojikiston, Yaponiyadagi oliy ta’lim muassasalarida o‘qiyotgan va
o‘zbek tilini o‘rganayotgan talabalar ishtirok etmoqda.
Ularning bilim,
ko‘nikma va malakalari Hakamlar hay’ati tomonidan baholanadi. Taqdim etilgan
ma’lumotlarga ko‘ra, Hakamlar hay’atiga o‘zbek tili va adabiyoti bo‘yicha chet
ellik tajribali mutaxassislar jalb qilingan. Xususan, Azizulloh Arol (AQSH),
Shafiqa Yorqin (Shvetsiya), Husayn Kaba (Turkiya), Almaz Ulvi Binnatova
(Ozarbayjon), To‘rali Qidir (Qozog‘iston), Darya Jigulskaya (Rossiya).
Shuningdek, o‘zbek tili va adabiyoti bo‘yicha o‘zbekistonlik yetakchi olimlar
ham hay’at tarkibida ishtirok etmoqda.
Xalqaro
fan olimpiadasini o‘tkazishga Alisher Navoiy nomidagi Toshkent davlat o‘zbek
tili va adabiyoti universiteti mas’ul bo‘lib, barcha tayyorgarlik ishlari olib
borildi.
O‘zbek tilining jozibadorligi, sofligi, rang-barangligini saqlash burchimizdir, – dedi oliy va o‘rta maxsus ta’lim vaziri maslahatchisi Odinaxon Jamoliddinova. Bunda yoshlarni kitobga kengroq jalb etish, davlat tili bo‘lmish ona tilimizga hurmat bilan munosabatda bo‘lishga da’vat etishga katta e’tibor qaratilmoqda. Oliy o‘quv yurtlarida o‘zbek tilini o‘qitish sifatini takomillashtirish borasida qator ishlar olib borilmoqda. Sir emaski, bugungi kunda ijtimoiy tarmoqlarda yoshlarning o‘zbek tilini buzib ishlatayotganiga guvoh bo‘lish mumkin. Shunday holatlarning oldini olishda, yoshlarda o‘zbek tiliga hurmat tuyg‘ularini shakllantirishda turli ijodiy tanlovlar, onlayn musobaqalar, bilimlar bellashuvlari, viktorinalarni tizimli tashkil etishga ahamiyat qaratilmoqda.
O‘zbek tili va adabiyoti fanidan Xalqaro olimpiada ikki kun davom etadi.
Nazokat
Usmonova,
O‘zA