- Bosh sahifa
- Maqolalar
- TIL VA TAʼLIM ISLOHOTCHISI (Nazariyadan amaliyotgacha)
TIL VA TAʼLIM ISLOHOTCHISI (Nazariyadan amaliyotgacha)
Mamlakatimizda filologiya sohasi olimlar va
tadqiqotchilar tomonidan keng va atroflicha o‘rganilmoqda, biroq asosiy eʼtibor
nazariy tilshunoslikka qaratilgan. Bir muddat nazariya amaliyotdan, hayotdan
uzilib qolgan edi. Ilm maydonida har bir olimning o‘z yo‘li va shunga mos ilmiy
maqsadlari bo‘ladi. Alisher Navoiy nomidagi Toshkent davlat O‘zbek tili va
adabiyoti universiteti professori, filologiya fanlari doktori - Baxtiyor
Rajabovich Mengliyev ham bu borada o‘ziga xos, jamiyat uchun foydali, zamon
talablariga mos ilmiy faoliyat yo‘lini tanlagan. O‘zi kabi shogirdlarini ham
jamiyat uchun to‘g‘ridan-to‘g‘ri naf keltiradigan tadqiqotlarga, amaliy tilshunoslikka
yo‘naltirdi. Yosh bo‘lishiga qaramay, o‘zining ilmiy maktabini shakllantirishga
erishdi. B.Mengliyev universitetda "Amaliy tilshunoslik va
lingvodidaka" kafedrasi tashkil qilib, shogirdlar bilan "O‘zbek
substansional tilshunosligi", "Gradual tilshunoslik",
"Kompyuter va korpus lingivistikasi", "O‘zbek o‘quv
leksikografiyasi", “Psixolingivistika”, "O‘zbek
lingvodidaktikasi", "Lingivistik ekpertiza", "Ortologiya"
va “Lingvomaʼnaviyatshunoslik” kabi sohalarni ilmiy va amaliy rivojlantirishga
hissa qo‘shmoqda.
Olim tadqiqotlarining amaliy ahamiyatini bevosita ona
tili taʼlimining takomilida ko‘rish mumkin. Xususan, umumiy o‘rta taʼlim
tizimida ona tili taʼlimi mazmunini yangilash, yangi o‘qitish metodikasini
amaliyotga joriy qilishga doir, ortiqcha grammatizmdan voz kechib, o‘quvchilarda
nutqiy ko‘nikmalarni rivojlantirish, lug‘at va matn asosida milliy tilni,
milliy maʼnaviyatni o‘quvchi tafakkuriga singdirish, o‘quvchini turli nutq
vaziyatlariga tayyorlash, ijodiy tafakkur sohiblarini tarbiyalash mexanizmini
ishlab chiqdi. Mazkur zamonaviy milliy metodika asosida 8-10-11-sinf "Ona
tili"darsliklarini yaratdi va ular amaliyotda foydalanilmoqda. Olimning
har qanday nazariy tadqiqotida amaliy ahamiyat ko‘zda tutiladi. Masalan, shogirdi
B.Bahriddinova bilan o‘quv lug‘atchiligi borasida olib borayotgan izlanishlari
ona tili taʼlimini rivojlantirishga xizmat qiladi. Bugun tilimiz zamonaviy
qiyofa kasb etishi, xalqimizga, davlatimizga yana ham foydaliroq bo‘lishi uchun
u kompyuterlashishi kerak. Olim iqtidorli shogirdi -Sh.Hamroyeva bilan korpus
lingivistikasiga doir muhim tadqiqotlarni olib bormoqda.
Umuman, professor Baxtiyor Mengliyev o‘zing ko‘p
tarmoqli amaliy ahamiyatga molik tadqiqotlari bilan mamlakatimiz taraqqiyotiga
o‘zining munosib hissasini qo‘shib kelmoqda. Ustoz hali endi 50 yoshdan
oshdilar, u kishining ilmiy faoliyati ko‘pchilik yosh tadqiqotchilarga namuna
darajasida bo‘lgani bois ushbu fikrlarni bayon qilishga ahd qildik. Olimlarimiz
o‘z izlanishlarini amaliyotga bog‘lay olmas ekan, jamiyat taraqqiy etmaydi. Bu
borada bag‘rikeng, shogirdlarga do‘stona munosabatda bo‘luvchi, shaxs uchun
ham, davlat, ilm-fan uchun ham foyda keltiruvchi to‘g‘ri yo‘lni ko‘rsata
oladigan B.Mengliyev kabi g‘amxo‘r, maslakdosh ustozlardan ibrat olish kerak.
Maʼnaviyat va til fidoyisiga tug‘ilgan kun qutlug‘
bo‘lsin! Ustoz, sharafli ishlar uchun dunyoga kelgansiz, o‘zbek tili va
taʼlimini jahonga tanitish ishlarida Sizga omadlar tilaymiz!
G‘ofir Hamroyev
Pedagogika fanlari bo‘yicha falsafa doktori