- Bosh sahifa
- Maqolalar
- ONA TILIMIZGA QANOT BERGAN HURRIYAT
ONA TILIMIZGA QANOT BERGAN HURRIYAT
Dunyoda o‘zligini anglagan, qadr-qimmati, or-nomusini
sharaf deb bilgan biror millat, xalq yo‘qki, ozod va farovon yashashni
istamagan va bu yo‘lda kurashmagan bo‘lsa. Chunki odam bolasi hurriyat tufayli
erkin yashaydi, o‘z ona tilida bemalol gaplashadi, fikrini mustaqil bayon
qiladi. Hurriyat atalmish neʼmatning huquqiy asosini esa har bir davlatning
asosiy qonuni hisoblangan Konstitutsiya belgilab beradi.
Mustaqilligimizning huquqiy poydevori
Davlat xalq irodasini ifoda etib, uning manfaatlariga
xizmat qiladi. Davlat organlari va mansabdor shaxslar jamiyat va
fuqarolar oldida masʼuldirlar.
O‘zbekiston
Respublikasi Konstitutsiyasi, 2-modda.
Har bir davlatning Konstitutsiyasi, avvalo, unda yashovchi xalqning
irodasini, ruhiyatini, ongi va madaniyatini aks ettiradi. Shu maʼnoda,
Konstitutsiyamiz xalqimizning siyosiy donoligi va tafakkuri mahsulidir. Tub
mohiyati, falsafasi, g‘oyasiga ko‘ra ilg‘or milliy va umuminsoniy qadriyatlarni
o‘zida mujassam etgan Bosh qonunimizda jamiki dunyoviy neʼmatlar orasida eng
ulug‘i – inson, degan fikr ilgari surilganligi, ayniqsa, tarixiy voqeadir.
Konstitutsiyamizning 14-moddasidagi “Davlat o‘z faoliyatini inson va
jamiyat farovonligini ko‘zlab, ijtimoiy adolat va qonuniylik prinsiplari
asosida amalga oshiradi”, degan jumla ham fikrimizni tasdiqlaydi.
Eʼtiborlisi, Asosiy qonunimizning yaratilish jarayonlarida
millatimizning o‘zligini anglatuvchi ona tilimizga alohida urg‘u berilganidir.
Xususan, tarixiy manbalarga ko‘ra, Konstitutsiyamiz umumxalq muhokamasiga
taqdim etilgan 1990-1992-yillarda Konstitutsiyaning 4-moddasi birinchi
xatboshida “Uning hududida yashaydigan barcha millatlar va elatlar tillariga
hurmat bilan munosabatda bo‘lish taʼminlanadi, tillarni rivojlantirish uchun
sharoit yaratiladi”, deyilgan edi. Bu xatboshi: “O‘zbekiston Respublikasi o‘z
hududida istiqomat qiluvchi barcha millat va elatlarning tillari, urf-odatlari
va anʼanalari hurmat qilinishini taʼminlaydi, ularning rivojlanishi uchun
sharoit yaratadi”, deb qaytadan to‘g‘rilanadi. Bu bilan ham xalqimiz
mentaliteti (tiynati)ga xos bag‘rikenglik, feʼl-atvoriga mos moʻtadillik
fazilatlari tarannum etilgan.
Asosiy qonunimizning yana bir o‘ziga xos xususiyati jahonda
Konstitutsiya bobida to‘plangan tajriba hamda xalqaro huquqning umumeʼtirof
etilgan qoidalarini qamrab olish bilan birga xalqimiz madaniyati va
anʼanalarining teran ildizlariga suyanganidadir.
Mustaqil O‘zbekiston Konstitutsiyasi demokratik konstitutsiyadir.
Tarixda sinalgan umuminsoniy, umumbashariy qadriyatlarni o‘zida mujassam etgan
hujjatdir. Uning butun mazmun-mohiyatiga mustaqillik g‘oyasi singdirilgan.
Shu bilan birga, Asosiy qonunimiz eng rivojlangan, taraqqiy topgan
davlatlarning tarixiy tajribasiga tayangan holda yaratilgan. Bunda rivojlangan,
rivojlanayotgan 97 ta mamlakatning konstitutsiyalari o‘rganilgan, tahlil qilingan.
Konstitutsiyamizning xalqimiz ijtimoiy-iqtisodiy hayotida, mamlakatimiz
ravnaqida tutgan o‘rni va ahamiyati juda katta. Muhimi, u hayot sinovlaridan muvaffaqiyatli o‘tib kelmoqda.
Konstitutsiyada xalqimizning
uzoq o‘tmish davrlardan buyon shakllanib kelayotgan milliy tafakkuri, ona tili,
muqaddas qadriyatlari o‘z aksini topgan, xalqimiz ko‘nglida ustuvor bo‘lgan
adolat, haqiqat, iymon, olijanoblik, bag‘rikenglik, mardlik kabi ulug‘
xislatlar o‘rin olgan. Mana, qariyb 28 yildirki, Vatanimiz o‘zining Konstitutsiyasi
bo‘yicha yashab kelmoqda. Har yili 8-dekabr
– Konstitutsiyamiz qabul qilingan kun sifatida keng miqyosda nishonlanmoqda. Xalqimiz va
davlatimiz unda belgilangan ezgu maqsadlar sari izchil intilib kelmoqda.
Konstitutsiyamizning barqarorligini, uning eng muhim prinsiplari va
normalarini har bir vatandoshimiz anglab yetishi zarur. Chunki u
maʼnaviy-madaniy ehtiyojlarni, vatanparvarlik tuyg‘ularini, taʼbir joiz bo‘lsa,
xalqning vijdoni va diyonatini o‘zida mujassamlashtirgan bo‘lib, biz uchun muqaddasdir.
Albatta, zamon yangilanishda davom etaveradi. Yangi talablar Asosiy
qonunimizga o‘zgartirishlar kiritishni taqozo etishi ehtimoldan xoli emas. Ammo
xalqimiz qadriyatlari, ertangi orzularini o‘zida jamlagan Konstitutsiyamiz
bizning nurli kelajagimizni ham baxtu saodat mayog‘i singari yoritib turishi
shubhasiz...
Millat ko‘zgusi,
ruhi, qalbi, g‘ururi
Mustaqillik yillarida ona tilimiz yanada sayqallashdi, uning nufuzi,
mavqeуi oshdi.
Xalqimizning muqaddas qadriyatlaridan sanalgan ona tilimiz o‘zining qonuniy
maqomi va himoyasiga ega bo‘ldi. Konstitutsiyamizda davlat tilining maqomi
huquqiy jihatdan mustahkamlab qo‘yildi.
Til har bir millatning ulkan boyligi va bebaho mulki, o‘zligining
ajralmas belgisi hisoblanadi. Har bir xalq, har bir elat o‘zi hurmat va ehtirom
qiladigan tiliga ega. Tilda shu xalq, elatning tarixi va madaniyati aks etadi.
Zotan, o‘zlikni anglash, milliy ong va tafakkurning ifodasi, avlodlar
o‘rtasidagi ruhiy maʼnaviy bog‘liqlik til orqali namoyon bo‘ladi. Aynan shu
maqsadda O‘zbekiston mustaqillikka erishish ostonasida davlat tiliga huquqiy
maqom berish masalasi ustuvor qo‘yilib, 1989-yil 21-oktyabr kuni O‘zbekiston
Respublikasining davlat tili to‘g‘risidagi alohida qonun qabul qilindi. Qonunga asosan, eng
muhim qadriyatlarimizdan biri hisoblangan ona tilimiz o‘z maqomiga ega bo‘ldi.
Bu qonun bilan o‘zbek millatining maʼnaviyatini, ruhiyatini, qadrini
ko‘rsatadigan tilning huquqi mustahkamlandi.
Darhaqiqat, til nafaqat muomala vositasi, balki xalqning madaniyati,
urf-odati, uning turmush tarzi, tarixidir. Turli xalqlarning tillariga hurmat,
o‘z navbatida, o‘zaro tushunish, muloqotlarga imkoniyat yaratadi. Tillarning saqlanib
qolishi uchun esa ularni qo‘llab-quvvatlash zarur. Aynan til tufayli
insoniyat u yoki bu xalqqa mansubligidan faxrlanib yashaydi.
Hozirgi kunda yer yuzida 7 mingdan ziyod til mavjud bo‘lsa,
ularning faqat 200 ga yaqini davlat tili yoki rasmiy til maqomiga ega.
Mamlakatimizda 7 ta tilda (o‘zbek, rus, qaraqalpoq, qozoq, qirg‘iz, tojik va
turkman tilida) taʼlim berilayotgani va shu tillarda darsliklar, adabiyotlar va
taʼlim olish uchun zaruriy manbalar yetarlicha taʼminlanayotgani yurtimizda
“Tilga eʼtibor – elga eʼtibor” hikmatining jamiyat hayoti farovonligida
o‘zining munosib o‘rnini topayotganiga yaqqol isbotdir. Ulug‘
maʼrifatparvar Abdulla Avloniy taʼkidlaganidek, har bir millatning dunyoda
borligini ko‘rsatadigan oyinai hayoti uning milliy tili va adabiyotidir.
Yangi fikrlash –
yangicha dunyoqarash
“Davlat tili haqida”gi qonun qabul qilingan kun – 21-oktabr
sanasining O‘zbek tili bayrami kuni deb eʼlon qilinishi
mamlakatimizning yangi tarixi, yangi taraqqiyot bosqichida amalga
oshirilayotgan izchil islohotlarning ishonchli samarasi, mustaqil Vatanimiz
ijtimoiy-siyosiy, huquqiy, madaniy, maʼnaviy hayotidagi ulkan voqeadir. Ushbu
muhim tashabbus davlatimiz rahbari Shavkat Mirziyoyevning 2019-yil 21-oktabr
kuni qabul qilingan “O‘zbek tilining davlat tili sifatidagi nufuzi va
mavqeуini tubdan oshirish chora-tadbirlari to‘g‘risida”gi farmonida o‘z
ifodasini topgan edi. Farmonga
binoan, ona tilimizning istiqboldagi taraqqiyotiga oid ko‘plab masalalar
qatorida Vazirlar Mahkamasida davlat tilini rivojlantirish bo‘yicha
alohida departament, Atamalar komissiyasi tashkil etildi. Vazirlik,
idora va xo‘jalik birlashmalarida rahbarning maʼnaviy-maʼrifiy ishlar
samaradorligini oshirish, davlat tili to‘g‘risidagi qonun hujjatlariga rioya
etilishini taʼminlash masalalari bo‘yicha o‘rinbosariga tenglashtirilgan
maslahatchi lavozimi joriy etildi.
Mazkur departament tomonidan joriy yil mobaynida qator ishlar amalga
oshirildi. Xususan, Prezidentimizning yuqorida nomi keltirib o‘tilgan farmonida
belgilangan vazifalar ijrosini taʼminlash maqsadida jami 14 ta meʼyoriy-huquqiy
hujjat, jumladan, 1 ta qonun, Prezidentning 1 ta farmoni va 1 ta qarori,
shuningdek, Vazirlar Mahkamasining 10 ta qarori qabul qilindi.
Hozirgi kunda O‘zbekiston Prezidentining “Mamlakatimizda o‘zbek tilini
yanada rivojlantirish va til siyosatini takomillashtirish chora-tadbirlari
to‘g‘risida”gi farmoni, shuningdek, “Buyuk shoir va mutafakkir Alisher Navoiy
tavalludining 580 yilligini keng nishonlash to‘g‘risida”gi qarori ijrosini
taʼminlash maqsadida bitta qonun va qator meʼyoriy-huquqiy hujjatlar loyihasi
ishlab chiqilgan.
Qayta ishlangan, to‘ldirilgan “O‘zbek tilining izohli lug‘ati”ning
yaratilishi yurtimiz maʼnaviy-maʼrifiy hayotida quvonchli voqea bo‘ldi. Ushbu
kitobning xorijda, xususan, Buyuk Britaniya, Germaniya, Italiya, Portugaliya,
Fransiya, Janubiy Koreya, Belarus, Belgiya, Rossiya, Ukraina, Misr, Xitoy,
Yaponiya, Indoneziya, Turkiya, Ozarbayjon, Hindiston, Pokiston, Isroil,
Qozog‘iston, Afg‘oniston kabi davlatlarda taqdimoti o‘tkazilishi kishiga
zavq-shavq bag‘ishlaydi, o‘zgacha masʼuliyat ham yuklaydi.
Aytish joizki, ona tilimizning mavqeуini xalqaro miqyosda yoyishda
ham samarali ishlar amalga oshirilmoqda. Birgina misol, Tashqi ishlar vazirligi
ko‘magida xorijdagi 36 ta elchixona va konsulxonaga o‘zbek tili darsliklari,
metodik qo‘llanmalar, jami 250 nomdagi ilmiy va badiiy adabiyot elektron
ko‘rinishda tarqatildi. Shuningdek, AQSH, Germaniya, Turkiya, Ozarbayjon,
Ukraina singari mamlakatlarda o‘zbek tilining jozibasi va uni o‘rganish
uslublariga bag‘ishlangan 10 ga yaqin vebinar (onlayn seminar) o‘tkazildi.
“Telegram” mobil messenjerida til maslahatchilari guruhi
shakllantirilib, OAV va ijtimoiy tarmoqlarda eʼlon qilinayotgan materiallarda
davlat tiliga doir qonunbuzilish holatlarini muhokama qilish hamda
kamchiliklarni tezkor bartaraf etish, qo‘shtirnoq ichidagi turli xolis
munosabatlarga nisbatan asoslantirilgan munosabat bildirish tizimi yo‘lga
qo‘yildi.
Hozir davlat tilining buzilishi holatlarini aniqlashda “Feysbuk”
ijtimoiy tarmog‘i va “Telegram” messenjeri foydalanuvchilari ishtirokida uzviy
jamoatchilik nazorati joriy qilingan bo‘lib, turli bloger va guruhlar bilan
yaqindan hamkorlik o‘rnatilgan. “Feysbuk”da atamalarning elektron manbaуini to‘plashga
qaratilgan “O‘zbekchasi borku!” onlayn kanalining yo‘lga qo‘yilishi ham shular
jumlasidandir.
Loqaydlik g‘animdan xavfli,
deydi xalqimiz. Bu bejiz emas, albatta. Bu maqolning qanchalik dolzarb ekani tashqi
yozuvlar, yaʼni peshlavha, reklama va boshqa eʼlon, axborot matnlarini
tartibga solish nuqtai nazaridan respublika bo‘yicha o‘tkazilgan xatlovda
ham ko‘rindi.
Xatlov natijasida
o‘rnatilgan 275 581 ta tashqi yozuvning 124 705 tasi, yaʼni 45,3
foizini o‘zgartirilishi lozim, deb topildi. Shundan 81 379 tasi
xorijiy tilda, 20 595 tasi xato bilan yozilgan, 22 731 tasi yaroqsiz
(eskirgan). Talabga javob bermaydigan 49 639 ta tashqi yozuv olib
tashlandi.
Shuningdek, geografik obyektlarga nom berish borasida respublika
bo‘yicha mavjud geografik obyektlar xatlovdan o‘tkazilib, ularning ham ro‘yxati
shakllantirildi. Hozirga qadar mahalliy kengashlarining qarorlari asosida 65 ta
qishloq, 263 ta mahalla, 171 ta aholi punkti, 16 296 ta ko‘cha, 14 ta maydon,
22 ta xiyobon, 208 ta qabristonga nom berildi yoki nomlari o‘zgartirildi.
Jumladan, respublika bo‘yicha 11 886 ta nomsiz ko‘chaning
7 583 tasi qonunchilikda belgilangan tartibda nomlanib, tuman (shahar)
kengashlarining shunga oid qarorlari bilan tasdiqlandi. Qator hududlarda nomi
takrorlanadigan ko‘chalar, maʼnosiz joy nomlari aholi bilan kelishilgan holda
boshqa nomlarga o‘zgartirildi. Mahalliy kengashlarning qarori asosida nomlangan
va nomi o‘zgartirilgan minglab joy nomlari davlat reyestriga kiritish bo‘yicha
Kadastr agentligiga taqdim etildi. Qishloq, mahalla, aholi punkti, ko‘cha,
maydon, xiyobonlarning nomi yozilmagan va peshlavhalar o‘rnatilmagan joy
nomlari o‘rniga lotin alifbosiga asoslangan o‘zbek tilidagi peshlavhalar
o‘rnatildi.
Geografik obyektlarning joylashgan joyi, nomi to‘g‘risida maʼlumotlar
beruvchi, foydalanuvchilar uchun qulay, nomlar bo‘yicha o‘z takliflari va
tavsiyalarini joylashtirish imkoniyati mavjud bo‘lgan “geonames.uz” havolasi
orqali Geografik obyektlarning nomlari davlat reyestrining axborot veb-portali
ishga tushirildi.
“O‘zbek tilining izohli lug‘ati”, “Davlat tilida ish yuritish”, “So‘z
sandiqchasi”, “So‘z xiyoboni”, “Xalqaro terminelementlarning izohli lug‘ati”
O‘zbek tilini rivojlantirish jamg‘armasi mablag‘lari hisobidan 23 mingdan ziyod
nusxada nashr qilinib, taqdimotlari o‘tkazildi.
Bu kitoblar davlat idoralari va tashkilotlar, o‘quv muassasalariga
beg‘araz tarqatilmoqda. Xususan, bolalar uchun lug‘at kitobcha – “So‘z
sandiqchasi” respublikadagi barcha umumtaʼlim maktablari kutubxonalariga
yetkazish uchun Xalq taʼlimi vazirligiga taqdim etildi. Shuningdek,
hamyurtlarimizga qulaylik yaratish maqsadida “O‘zbek tilining izohli
lug‘ati”ning “ilug‘at” mobil ilovasi, uning oflayn kompyuterlarda ishlay
oladigan desktop dasturi hamda kompyuter dasturni yuklab olish uchun http://ilugat.uz sayti yaratildi.
Innovatsion rivojlanish vazirligi bilan hamkorlikdagi ilmiy loyihalar
tanlovi “jadid.uz” elektron platformasi, o‘zbek tilining milliy korpusini,
yangi avlod o‘quv lug‘atlari va ularning mobil ilovalarini, o‘zbek tilini
xorijiy til sifatida o‘qitishning metodik taʼminoti bo‘yicha elektron platforma
yaratishga qaratilgan. Ushbu grantlar uchun jami 20 ga yaqin talabgor hujjat
topshirgan bo‘lib, ayni paytda ilmiy saralash bosqichi davom etmoqda.
Har bir qilingan ish o‘z aksini topishi, insonlar qalbidan joy olishi
muhimdir. Shu maʼnoda Vazirlar Mahkamasi muassisligidagi “Yangi O‘zbekiston”
ijtimoiy-siyosiy gazetasida “Til – millat g‘ururi” nomli yangi rukn tashkil
etildi va davlat tili bilan bog‘liq maqolalar muntazam ravishda chop etib
borilmoqda. Hozirga qadar gazetada bu borada 80 dan ortiq ommabop maqola eʼlon
qilindi.
Bundan tashqari, OAVda
davlat tili bo‘yicha targ‘ibot qilinayotgan materiallarning doimiy monitoringi
yo‘lga qo‘yilgan bo‘lib, bosma OAVda, teleradiokanallarda hamda ijtimoiy
tarmoqlarda davlat tili targ‘ibotiga doir yuzlab, minglab materiallar eʼlon
qilinib borilmoqda.
21-oktabr – O‘zbek tili bayrami kuni munosabati bilan
davlat tiliga oid muammolarni hal etishda ijodiy yondashuvni rivojlantirish maqsadida
“Qadring baland bo‘lsin, ona tilim” xalqaro tanlovi o‘tkazilgani o‘z ijobiy
natijalarini berdi. Buni tanlov jarayonida tashkiliy qo‘mitaga kelib tushgan
ikki mingga yaqin ijodiy ishdan ham bilsa bo‘ladi. Ayniqsa, AQSH, Fransiya,
Rossiya, Janubiy Koreya, Xitoy, Turkiya, Eron, Ozarbayjon, Afg‘oniston,
Qozog‘iston, Qirg‘iziston, Tojikiston singari yaqin va uzoq xorij mamlakatlari
vakillari ishtiroki tadbirga o‘zgacha fayz kiritdi, nufuzini oshirdi.
Ona tilimizning xalqaro nufuzi
O‘zbekistonning Turkiy tilli
davlatlar hamkorlik kengashiga to‘la huquqli aʼzo bo‘lib qo‘shilishi o‘zbek
tilining turkiy tillar oilasidagi o‘rni naqadar muhimligini isbotladi. So‘nggi
yillarida mamlakatimizda o‘zbek adabiy tilini rivojlantirish masalalariga
alohida eʼtibor qaratilmoqda. Buning natijasida o‘zbek tili davlat tili, davlat
ramzi, milliy madaniyat va maʼnaviyatni ifodalovchi hamda ularni kelajak
avlodga yetkazuvchi muhim muloqot vositasi darajasiga ko‘tarildi. O‘zbek
tilining xalqaro miqyosdagi nufuzi oshib, faol muloqot vositasiga aylanib
bormoqda. Turli darajadagi rasmiy uchrashuvlar, muzokaralarda tilimiz keng
qo‘llanilib, xorijdagi ko‘plab universitetlar, ilmiy muassasalarda o‘zbek tili
markazlarida ona tilimizni o‘rganishga qiziquvchilar safi tobora ortib bormoqda.
Jumladan, hozir dunyoning 65 ta oliy o‘quv yurtida o‘zbek tili kurslari
faoliyat yuritadi. Kelgusi 2021 yilda AQSHning ko‘plab universitetlarida ham
o‘zbek tili kurslari tashkil etilishi rejalashtirilgan.
Davlatimiz rahbari Shavkat
Mirziyoyevning 2020 yil 23 sentyabr kuni BMT Bosh Assambleyasining
75-sessiyasida ishtirok etishi va nufuzli minbarda mustaqil O‘zbekiston
tarixida ilk bor o‘zbek tilida nutq so‘zlashi qalbimizda cheksiz faxr
tuyg‘ularini uyg‘otgani ham ayni haqiqat. Davlatimiz rahbarining BMTda o‘zbek
tilida nutq so‘zlashi ona tiliga va o‘zbek xalqiga cheksiz mehr-muhabbati,
yangi O‘zbekiston kelajagiga yuksak ishonchining yaqqol ifodasidir.
Til xalqni birlashtiradi,
tarbiyalaydi, o‘qitadi, urf-odat, ananalarini saqlaydi. Shunday ekan, ona tilimizning
xalqaro miqyosdagi obro‘-eʼtiborini yuksaltirishda, uning milliy va
umumbashariy tushunchalar asosida taraqqiy etgan tillar safiga qo‘shilishida
har birimizning hissamiz bo‘lishi kerak. Uni himoya qilish, asrab-avaylash,
targ‘ib etish, turli xurujlardan saqlagan holda kelgusi avlodlarga bekamu ko‘st
yetkazish shu millat vakillarining insoniy vazifasi, maʼnaviy burchidir.
Til – har bir millatning ruhi, qalbi, g‘ururi, mustaqillik belgisi,
kelajagi. Tilsiz hech bir millat to‘laqonli xalq bo‘la olmaydi. Shunday ekan,
ona tilimizni asrab-avaylash, uning mavqeуini ko‘tarish har birimizning
faol fuqarolik burchimiz ekanini aslo unutmaylik.
Abdug‘affor
QIRG‘IZBOYEV,
Vazirlar
Mahkamasining
Davlat
tilini rivojlantirish departamenti mudiri