- Bosh sahifa
- Maqolalar
- NUQTAYI NAZAR: BUGUNGI BRENDLAR HAQIDA
NUQTAYI NAZAR: BUGUNGI BRENDLAR HAQIDA
O‘z mehnatini, hayot tarzini, hududi va madaniyatini ma’lum
bir simvollarda, ya’ni zamonaviy ibora bilan aytganda, brendlar orqali ifodalash
insondagi qadimgi mashg‘ulotlardan biridir. Masalan, qadimgi totemistik tasavvurlar
qavm, urug‘ sig‘inadigan hayvon obrazi, simvoli tarzida ifoda etilgan, mazkur brendni
rad qilish, toptash aslo mumkin emasdi. Taniqli etnograf va madaniyatshunos E.Taylor
totemizm va animizm ibtidoiy kishilarning, qavm va urug‘larning “hayot falsafasi”
bo‘lganini ta’kidlaydi. Bu falsafa totem obrazida, simvolida ifodalangan. Masalan,
turk qavmlarida bo‘ri shunday simvol bo‘lgan.
Ilmiy-texnik
rivojlanish brendni tovar, arxitektura, lokal madaniy hayot, hatto etnik identifikatsiyalash
san’atiga aylantirdi. E.Vohidov kuylagan do‘ppi (“Boshda do‘ppi g‘oz yurasan gerdayib”)
o‘zbek etnosining milliy brendi hisoblanadi. Marg‘ilon atlasi, Xorazm lazgisi va
Ichanqal’a ansambli, Samarqanddagi Registon majmui, Buxorodagi Labi Hovuz kompleksi,
Toshkentdagi Mustaqillik va Amir Temur maydoni, Yangi O‘zbekiston bog‘i brendlar
tarzida qabul qilinadi.
Brend
san’ati avval tovarlarning simvollari sifatida ommalashgan. Shuningdek, yirik trans
milliy korporatsiyalar o‘z brendlariga ega. Masalan, “Adidas”, “Arrle”,
“Samsung”, “General Motors” kompaniyalarining mahsulotlarini biz ularning brendlari
orqali tez bilib olamiz. Bu simvollar hammaga tushunarli, o‘ziga xos, betakrordir,
ular tez esda qoladi.
Keyingi
yillarda xalqaro turizmning rivojlanish ta’sirida lokal etno madaniyatlarni brendlash
masalasi kun tartibiga chiqdi. Etnomadaniy hayotni videofilmlarga olish yoniga brend
yaratish san’ati ham qo‘shildi. Tarixiy-madaniy obidalarga ega shaharlar, avvalo,
brendlari orqali o‘zini targ‘ib etadi, sayyohlarni jalb qiladi. Amerikani biz Ozodlik
monumenti, Parijni Eyfel minorasi, Moskvani Kremli orqali yanada yorqinroq idrok
etamiz, chunki aynan ushbu simvollar ko‘p targ‘ib etiladi. O‘zbekistonning har bir
shahar va etnomadaniy turizm markazlaridan shunday simvollar topish, yaratish mumkin.
Buning uchun avvalo, aholining sotsiopsixologik holatini, ya’ni shaharga o‘zini
identifikatsiyalashini o‘rganish zarur. Kishilar shahardagi qaysi tarixiy-madaniy
yoki zamonaviy ansambli bilan o‘zini identifikatsiyalashga moyil? Bir paytlari toshkentliklar
o‘zini hozirgi Amir Temur maydonidagi soatli kurant bilan identifikatsiyalashgan.
Mashinasozlar zavodi, TTZ, Tekstil kombinati, hatto viloyatlar o‘z brendlariga ega
bo‘lgan. O‘zbekistonning xalqaro brendi bir vaqtlar oppoq paxta chanog‘i edi. Bundan
olti yillar avval Toshkent shahar hokimiyati poytaxt brendini katta “T” tasvirida
yaratishga urinib ko‘rdi, ammo u kishilar madaniy hayotidan joy olmadi. Keyingi
ijtimoiy-madaniy o‘zgarishlar esa poytaxtning zamonaviy, ta’sirchan brendini yaratishni
taqozo etadi.
Brend
faqat musavvir yoki chizmachining ishi emas. U shaharning tarixini, etnografiyasi
va infratuzilmasini, arxitektura va rivojlanish istiqbollarini yaxshi biladigan
mutaxassislar ijodiy hamkorligining mahsuli bo‘ladi. Etnomadaniy turizm istiqbollari
har bir sayyohlik manzillari uchun etnoxususiyatlarga muvofiq milliy brendlar yaratishga
undaydi. To‘g‘ri, ba’zan brend tarixiy-madaniy rivojlanish jarayonida avtomatik
tarzda shakllanadi. Masalan, Samarqand, Buxoro, Xiva, Shahrisabz shahar brendlari
qadimiy obidalar simvollari orqali avtomatik tarzda shakllangan. Ushbu shaharlardagi
turistik tarixiy-madaniy yodgorliklar brendlar tarzida ongimizdan joy olgan. Ammo
bu zamonaviy brendlar yaratish zarurligini rad etmaydi. Buning uchun, bizning fikrimizcha,
quyidagilarni amalga oshirish lozim:
Birinchidan,
tasviriy san’at, arxitektura, dizayn o‘quv yurtlarida brendologiya bo‘yicha mutaxassislar
tayyorlash zarur. Brend shunchaki simvol yaratish, chizish emas, u aholining identifika
siyalashuvi, etnopsixologiyasi va etnomadaniyatini ham o‘rganishni, bilishni taqozo
etadigan sohadir. Brend etnomadaniy va etnostetik ijod turi, u orqali biz o‘zligimizni
targ‘ib etamiz. Bundan tashqari, tovarlar ishlab chiqish va xizmatlar ko‘rsatish
oshib borayotgan hozirgi paytda har bir korxona, tadbirkor o‘z brendini yaratishga
intiladi. Ta’sirchan brend ularning imiji hamdir. Bu esa brend yaratuvchi mutaxassislar
tayyorlashga alohida talab qo‘yadi.
Ikkinchidan,
brend shahar arxitekturasi va estetikasining simvolik ifodasi hisoblanadi. U shahar
aholisining turmush tarzini, go‘zallik haqidagi tasavvurlarini ko‘rsatadi. Brend
faqat tarixiy-madaniy obidalar tasviridan iborat emas, u kishilarni ma’naviy birlashtiruvchi,
ularda optimizmni shakllantiruvchi zamonaviy omil bo‘lishi darkor. Kreativ faollikka,
yaratib yashashga undash g‘oyasi brendga singdirilishi vojib. Ming afsuski, bizda
negadir “I love Kibrai” tarzidagi shiorni brendga aylantirish an’ana bo‘lmoqda.
O‘zim
Qibray shaharchasida turaman. “Dom”lar orasi tashlandiq, ariqlar axlat va chiqindilarga
to‘la, har yili daraxtlar ekiladi, lekin qarovsizlikdan nobud bo‘laveradi, birorta
tekis, to‘la ta’mirlangan ko‘cha yo‘q. Xo‘sh, yuqoridagi shior-brendga kim ishonadi?
Hokimiyat oldidagi xo‘jako‘rsinga yasalgan, yuz millionlab pul sarflangan, didsiz
yo‘lak va chiroq-brend kishilarda taajjub uyg‘otadi. Nima shaharchada pul sarflanadigan,
ta’mirlanadigan, barpo etilmay kelinayotgan joylar yo‘qmi? Mana, badiiy-estetik
didsizlik, xo‘jako‘rsinga brend yaratish qanday kulgili hodisaga aylanadi. Qibray
ixcham, sersuv, e’tibor qilinsa go‘zal, betakror, brend-shaharchaga aylanishi mumkin.
Uchinchidan,
ijtimoiy hayot tez o‘zgarish xususiyatga ega. Modernizatsiyalash shiddati etnomadaniy
turizm markazlari qiyofalarini ham o‘zgartirib yubormoqda. Brend esa barqaror voqelik,
u ma’lum bir simvol sifatida yodda muhrlanib qolishi kerak. Brendni yaratuvchilar
ushbu ikki, bir-biriga zid jihatni hisobga olishga majbur. Modernizatsiya brend
shakllarini o‘zgartirishga majbur qilgan taqdirda ham, u o‘zining barqaror simvol
bo‘lib qolishini unutmasligi zarur.
Brendni
yaratishda musavvirning o‘rni katta. Badiiy-estetik bilimlar va tajribalarga ega
musavvir kishilarning go‘zallik haqidagi tasavvurlarini brenda mujassam etishi
mumkin bo‘lgan ijodkordir. Shuning uchun brend yaratishda, avvalo, musavvir mas’ul.
Uning arxitektor, dizayn va reklama ustalari bilan hamkorligi shahar brendini serma’no,
badiiy ta’sirchan qiladi. Musavvirga buyurtmalar berishga bosh-qosh bo‘lgan hokimliklar,
korxonalar va tadbirkorlar faqat o‘zining shaxsiy manfaatlarini nazarda tutmasligi
kerak. Brend ijtimoiy-madaniy hayot, taraqqiyot belgisi, ifodasi ham hisoblanadi.
Shahar aholisi brendi bilan faxrlanadi, qaerga borsa uni unutmaydi, targ‘ib etadi.
Alvonlar, gerblar, bitiklar, hatto muhrlar ham o‘z ma’nolariga va maqsadlariga ega
brendlardir. Shunday ekan, brendlar yaratish o‘ta mas’uliyatli vazifa, unda nafaqat
o‘tmishga oid xotiralarimiz, shuningdek, kelajakka qaratilgan, optimizmga to‘la
o‘ylarimiz va rejalarimiz mujassamdir.
Yuqorida
aytganimizdek, “I love Tashkent” deya uning yoniga yurakning rasmini chizib ustunga
joylash — bu brendga emas, uyatga kiradi. Necha asrlik o‘tmishiga, ulkan madaniyati
va eng muhimi bag‘rikeng, mehnatkash aholisiga ega, og‘ir urush yillarida “Non shahri”ga
aylangan Toshkent bugun qanday brendga ega? Bunday masalalarni o‘ylab ko‘rsak xato
bo‘lmaydi.
Viktor ALIMASOV,
falsafa fanlari doktori,
O‘zbekiston davlat san’at
va madaniyat
instituti professori
“Hurriyat” gazetasidan