- Bosh sahifa
- Maqolalar
- Bir sandiq Soʻz
Bir sandiq Soʻz
I
Oʻz sepimga hayajonda koʻz soldim:
Birdan qamashib ketdi koʻz oldim.
Eng sara, eng goʻzal, eng dilbar –
Onam sepimga bir sandiq Soʻz soldi.
Bu soʻzlarni soʻzlaganda el dadil!
Bu soʻzlarni soʻzlaganda er dadil!
Bu soʻzlarni soʻzlaganda men –
dadil!
Ular meni baxt tomonga eltadi,
Bir sandiq Soʻz bir umrga yetadi!
“Alla, bolam, alla” desam bolamga.
“Assalomu alaykum” deb olamga.
“Xush keldingiz, xush koʻrdik” deb
bot-bot
Bir sandiq sepimga koʻngan Odamga!
Atlas soʻzlar, adras soʻzlar, boʻz
soʻzlar,
Shoyi-ipak soʻzlar, banoras soʻzlar,
Baxmal soʻzlar, movut soʻzlar, xos
soʻzlar,
Xoksor soʻzlar, balandparvoz
soʻzlar!
Oʻnta tilni biladigan tilmoch ham
Oʻz tilida gapirganda rost soʻzlar!
Onam yana solibdi bir nayqamish.
Momolarning oʻgitini payqamish:
Uyda ona tili jaranglab tursa,
Yov bostirib kirgani ham
hayiqa(r)mish!
Yana takror sandiqchaga koʻz soldim.
Oʻz qizimga qoldirgani qarz oldim.
Eng shirin, eng achchiq va mukammal
–
Onam sepimga bir sandiq Soʻz soldi!
II
Alla qudrati
Yo bismillo,
Ollo taolo!
Ona tilim –
keskir qilich.
Alpomishga
Alpinbiydan
qolgan oʻn toʻrt
botmon birich!
Keskir qilich,
sen avval kes
borligingni
bildirgani.
Ey parli yoy,
alplar emas,
Barchinoylar
kerak endi
seni joydan
jildirgani.
Yo bismillo,
Ollo taolo!
III
Chaqiriq
Oʻz tilingda qasr qur,
Yo boʻlmasa oʻtov tik!
Oʻzing mudom qoʻriqla,
Ogoh boʻlgin, mudom hurk!
“Devoni
lugʻotit turk”!
Jar sol ona tilingda.
Xabar ber xaloyiqqa.
Ona tilingda yigʻla,
Xush keladi Xoliqqa!
“Hibat-ul
haqoyiq”qa!
Qarab turma parishon,
Turma befarq va ojiz.
Yurtni qoʻriqlaganday
Tilni asrashing joiz.
“Majolis un-nafois”!
Aytib turadi, yozdim
Men yurakning kotibi!
Dunyoni kezib kelgan
Bu soʻzlar Bobur kibi.
“Voqeyoti
Boburiy”!
Mening topganlarim shu –
Oʻtgan-ketgan kunlardan.
Otabek Margʻilondan
Toshkan yetgan kunlardan...
Yaqin “Oʻtkan kunlar”dan.
Asrlar osha tingla
Bobolarning dardini.
Sen yuksaltir, sen koʻtar
Ona tilning qadrini!
Ona tilim qadrini!
Kumush Abdusalomova