- Bosh sahifa
- Maqolalar
- MASLAHATCHINING BIR KUNI...
MASLAHATCHINING BIR KUNI...
O‘zbekiston Texnik
jihatdan tartibga solish agentligi Markaziy apparati, tizim tashkilotlari,
hududiy filiallarida maʼnaviy-maʼrifiy ishlar samaradorligini oshirish va
davlat tili to‘g‘risidagi qonun hujjatlariga rioya etilishini taʼminlash
yuzasidan tizimli ishlar yo‘lga qo‘yilgan. Muntazam ravishda lotin alifbosiga
asoslangan davlat tilida ish yuritilishini taʼminlanishi yuzasidan tizim
tashkilotlari va hududiy filiallarda Bosh direktor maslahatchisi tomonidan monitoringlar
olib boriladi. Monitoring jarayonida ishlarning samaradorligi baholanadi,
aniqlangan kamchiliklar joyida bartaraf etiladi, yo‘nalish bo‘yicha ishlarning yana-da
takomillashtirish va jadallashtirish bo‘yicha tavsiyalar beriladi, hamkorlikda
turli mavzularda tadbirlar o‘tkaziladi.
Bugun Bosh direktor
maslahatchisining huddi shu maqsadda Agentlikning Qoraqalpog‘iston
Respublikasidagi hududiy filiallari faoliyatini o‘rganish uchun qilgan xizmat
safari tafsilotlari haqida maʼlumot bermoqchimiz va bu bilan maslahatchining
bir kunidagi faoliyatini batafsil yoritishga harakat qilamiz.
Maʼlumot o‘rnida aytib
o‘tish joiz, Agentlikning beshta tizim tashkiloti bo‘lib, O‘zbekiston Milliy
metrologiya instituti, O‘zbekiston ilmiy-sinov va sifat nazorati markazi,
Davlat nazorati Departamentining barcha viloyatlar va Qoraqalpog‘iston
Respublikasida hududiy filiallari faoliyat yuritadi. O‘zbekiston Respublikasi Vazirlar Mahkamasining 2022-yil
11-martdagi 114-sonli qaroriga asosan «O‘zbekiston texnik jihatdan
tartibga solish agentligi»ning asosiy vazifalari «Mahsulotlar va xizmatlarni sertifikatlashtirish
to‘g‘risida», «Standartlashtirish to‘g‘risida»,
«Texnik jihatdan tartibga solish to‘g‘risida», «Muvofiqlikni baholash to‘g‘risida», «Metrologiya to‘g‘risida»gi O‘zbekiston
Respublikasi qonunlari, texnik jihatdan tartibga solish sohasidagi,
o‘lchashlarning yagona birlikda bo‘lishini taʼminlashga doir normativ hujjatlar
hamda normativ-huquqiy hujjatlarning amaliy jihatdan amalga oshirilishini
taʼminlashdan iboratdir. Sohaga oid atamalar asosan o‘zlashgan so‘zlardan
iborat bo‘lgani uchun bu boradagi ishlarni tashkil qilish qanchalar murakkab
bo‘lmasin, o‘ziga xosligi, davlat tiliga soha bo‘yicha yangidan yangi
atamalarni kiritish bo‘yicha qilinadigan ishlarning ko‘pchiligi
soha oldiga yana-da katta vazifalarni qo‘yadi.
Agentlikning
maʼnaviy-maʼrifiy sohani rivojlantirish va davlat tili bo‘yicha siyosatga
kamarbasta bo‘lishda 2022-yildagi yangi yo‘nalishlaridan biri O‘zbekiston
Respublikasi Prezidenti Shavkat Mirziyoyev tashabbusi bilan yoshlarning
intellektual va ijodiy salohiyatini rivojlantirish, iqtidorli o‘quvchilarni
qo‘llab-quvvatlash va rag‘batlantirish uchun zarur shart-sharoitlar yaratish
hamda ularni barkamol, jismonan va ruhan sog‘lom shaxs sifatida Vatanga sadoqat
ruhida tarbiyalash, bolalarda mehnatsevarlik, vatanparvarlik, fidoyilik, keng
dunyoqarashga ega komil inson bo‘lishga intilish tuyg‘usini shakllantirish
maqsadida respublikamiz viloyatlari, Qoraqalpog‘iston Respublikasi, Toshkent
shahrida tashkil etilgan ijod maktablari va ixtisoslashtirilgan maktablar bilan
hamkorlik o‘rnatish bo‘ldi. Balki o‘quvchida
Agentlikning faoliyati uchun buning qanday aloqasi va ahamiyati bor degan savol
tug‘ilishi mumkin. Bu tabiiy. Farzandi eng zamonaviy taʼlim maskanida, xalqaro
talab asosida o‘qishini, malakali xorijiy pedagogdan taʼlim olishini istamagan
ota-ona bo‘lmasa kerak. Davlatimiz rahbari tashabbusi bilan tashkil etilgan
Prezident maktablari xalqimizning ana shunday orzu istaklarini ro‘yobga
chiqardi. Ko‘p asrlik tanaffusdan keyin allomalar yetishgan qadimiy o‘lkamizdan
yana Samarqandiylar, Xorazmiylar, Buxoriylar, Termiziylar, Nasafiylar, jahon
eʼtirof etgan olimlar va ixtirochilar, yetti iqlimni qalami bilan olgan
maʼnaviyat arboblari, diniy ulamolar yetishib chiqishiga ijodiy zamin va muhit
yaratilgani millatdoshlarimizga ishonch va umid tug‘dirdi. Va, aynan shunday
his-tuyg‘u va havas bilan Agentlik xodimlari ijod maktablariga tashrif
buyuradilar. Ijod maktabi nomi bilan atalgan adib va shoirlarning hayoti,
faoliyati, ijodi bilan yaqindan tanishadilar, ularning nafaqat o‘zbek
adabiyoti, balki o‘zbek adabiy tilining rivojiga qo‘shgan hissalari haqida
qiziqarli maʼlumotlarga ega bo‘ladilar va, hattoki, bugungi kunda davlat
tilining rivoji va yana-da mustahkamlanishi yo‘lida olib borilayotgan
ishlarning ko‘lamini kengaytirish zarurligi haqida xulosaga keladilar,
takliflar ishlab chiqadilar. Agentlik xodimlari ijod va Prezident maktablari
bilan hamkorlik o‘rnatish, birgalikda turli maʼnaviy-maʼrifiy tadbirlar
o‘tkazadilar, taniqli davlat va jamoat arboblari, sohaning ijodkor va ilg‘or
yoshlari bilan uchrashuvlar tashkil qiladilar. Hatto shunday holatlar bo‘lgan,
bu maktablardagi tadbirlardan keyin Agentlik xodimlari o‘z farzandlari,
nabiralari ham shunday maktablarda o‘qitish orzu-havasi paydo bo‘ladi,
ilm-fanga bo‘lgan qiziqishlari yana-da kuchayadi, “men ham farzandim, nabiramni
shu maktabda o‘qitaman” degan yaxshi niyat bilan ketishadi.
Shu
munosabat bilan safarning ilk tadbiri ham Nukus shahridagi Ibroyim Yusupov
nomli ijod maktabi bilan hamkorlik o‘rnatish va qo‘shma tadbirlar o‘tkazish
bo‘ldi. Shuni qayd etishimiz kerakki, hududiy filiallar o‘z faoliyatlari
mazmunidan kelib chiqib, o‘zlari joylashgan hududdagi barcha korxona va
tashkilotlarga, tadbirkorlik subyektlariga xizmat ko‘rsatadilar. O‘z o‘rnida,
uchrashuvda mazkur ijod maktabi bilan ham ushbu yo‘nalishda hamkorlik
masalalari muhokama qilindi. Mehmonlarni ijod maktabining iqtidorli
o‘quvchilari Ibroyim Yusupovning ijod namunalaridan sheʼr va qo‘shiqlar ijro
etish bilan qarshi oldilar. Ijod maktabi direktori maktabning tashkil etilishi,
undagi o‘quvchilarga yaratilgan sharoitlar, o‘quvchilarning iqtidori va
bilimini qo‘llab quvvatlash borasida amalga oshirilayotgan ishlar haqida
batafsil maʼlumot berdi, Ibroyim Yusupov hayoti va ijodiga bag‘ishlangan
moʻjazgina muzey bilan tanishtirdi. Iqtidorli yoshlarning o‘zbek, qoraqalpoq va
xorijiy tillarda o‘qigan sheʼrlari va aytgan qo‘shiqlari barchada katta
taassurot qoldirdi. Hatto, Bosh direktor maslahatchisi filolog olima va
tilshunos mutaxassis sifatida Ibroyim Yusupov ijodining o‘rganilishi, o‘zbek
adabiyoti va adabiy tilida alohida o‘ringa ega ekanligini yorqin misollar bilan
ochib berib, o‘quvchilik yillarida faqat “aʼlo” baholarga o‘qiganligini esladi.
So‘zining oxirida o‘quvchilarga ularni Prezident kutayotganligini alohida
taʼkidlab, “Sizlarni ko‘rib, men ham ijod maktablarida o‘qigim keldi,
agar yosh bo‘lganimda men ham ijod va Prezident maktablarida o‘qirdim” deya
so‘zlarini yakunladi.
Ijod
maktabiga Agentlik xodimlari bilan birga tashrif buyurgan O‘zbekiston
Respublikasi Vazirlar Mahkamasi huzuridagi Diniy ishlar qo‘mitasi vakilligi
masʼuli ham so‘zga chiqib, islom manbalarida ilm olish, vatanparvarlik va
halollik xususida keltirilgan oyat va hadislardan namunalar keltirib, qiziqarli
suhbat tashkil qildi. O‘quvchilar diniy ishlar qo‘mitasi vakilligi masʼuliga
o‘zlarini qiziqtirgan savollari bilan murojaat qilib, tegishli javoblarni
oldilar.
Keyingi
tadbir hududiy filiallar binosida o‘tkazildi. Unda hududiy filiallarda tashkil
etilgan maʼnaviy-maʼrifiy ishlar va davlat tilida ish yuritilishini taʼminlanishi
o‘rganildi. O‘rganish natijalari har uchala tizim tashkilotining hududiy
filialida alohida maʼnaviyat xonasi va idoraviy kutubxona tashkil etilgan
bo‘lib, ish yuritish to‘liq lotin alifbosiga asoslangan davlat tilida amalga
oshirilayotganini ko‘rsatdi. Xalqaro andozalarga mos ravishda jihozlangan
zamonaviy sinov aboratoriyalarida joylashtirilgan barcha turdagi peshlavhalar
hamda axborot burchaklaridagi maʼlumotlar lotin yozuviga asoslangan o‘zbek
alifbosida rasmiylashtirilgan. Bundan tashqari, maʼnaviy-maʼrifiy tadbirlar,
ijodiy kechalar, tarixiy obidalarga ekskursiyalar tashkil etilish muntazam
yo‘lga qo‘yilgan. Oliy taʼlim muassasasalari bilan olib borilayotgan
hamkorlikdagi faoliyat esa xodimlar malakasini oshirish, sohaga yosh va
izlanuvchan kadrlarni jalb etish imkoniyatini yaratadi. Qolaversa, filial
miqyosida xotin-qizlar uchun yaratilgan shart-sharoitlar, ularning bo‘sh
vaqtlarini mazmunli tashkil etish borasidagi ijobiy ishlarni ham taʼkidlash
lozim.
Shuningdek, hududiy
filiallarga tashrif buyurgan Agentlikning yaqin hamkori Nukus davlat
universiteti olimlari bilan sohaning ilmiy-tadqiqot yo‘nalishida qilinishi
kerak bo‘lgan ishlar xususida suhbatlashildi, talabalarning filiallar
laboratoriyalarida amaliyot o‘tashlarida aniq bir loyiha bilan tashkil
etilishi, bitiruv malakiy ishi va magistrlik dissertatsiyalarining mavzularini
berishda, ularning bajarilishida soha atamalari tadqiqiga ham eʼtibor
qaratilishi alohida taʼkidlandi. Chunki filiallar laboratoriyalarini o‘rganish
jarayonida talabalar amaliyot o‘tishayotgani guvohi bo‘lindi va soha atamalari
haqida berilgan savolga qoniqarli javoblar olinmadi va ularning soha
atamalarini egallashlarida muammolar mavjudligi ayon bo‘ldi. Shu nuqtai nazardan ushbu yo‘nalishda m qilinishi kerak bo‘lgan ishlar
belgilab olindi.
Maʼlumki,
aholining tadbirkorlik tashabbuslarini amalga oshirishga moliyaviy
ko‘maklashish, ularning daromadli mehnat bilan bandligini taʼminlash ishlarini
yana-da takomillashtirish, mahallabay ishlash tizimini yangi bosqichga olib
chiqish orqali kambag‘allikni qisqartirish, “mahallabay” ishlash tizimini
yana-da rivojlantirish maqsadida O‘zbekiston Respublikasi Prezidentining
“Mahallada tadbirkorlikni rivojlantirish, aholi bandligini taʼminlash va
kambag‘allikni qisqartirish bo‘yicha davlat siyosatining ustuvor yo‘nalishlari
to‘g‘risida”gi Farmoni bilan respublikamizning har bir mahallasida
tadbirkorlikni rivojlantirish, aholi bandligini taʼminlash va kambag‘allikni
qisqartirish masalalari bo‘yicha hokimining yordamchisi lavozimi taʼsis etilgan
edi.
O‘zbekiston
Respublikasi Prezidentining “Mahallada
tadbirkorlikni rivojlantirish, aholi bandligini taʼminlash va kambag‘allikni
qisqartirish masalalari bo‘yicha hokim yordamchilari faoliyatini tashkil etish
chora-tadbirlari to‘g‘risida”gi Qarori bilan respublika vakili - hokim
yordamchilari faoliyatini samarali tashkil etish maqsadida vazirlik, idoralar,
tijorat banklarining masʼul xodimlarini har bir tuman va shaharga biriktirilib,
ularning ish joyi, oylik ish haqi va boshqa ijtimoiy to‘lovlarini saqlab qolgan
holda, biriktirilgan hududga bir yillik xizmat safariga yuborilishi yo‘lga
qo‘yildi. Aynan ushbu Qarorda belgilangan vazifalar ijrosini taʼminlash
maqsadida O‘zbekiston texnik jihatdan tartibga solish agentligidan ham 8 nafar
malakali xodimi viloyatlardagi tumanlarga hokim yordamchilari – respublika
vakillari sifatida biriktirilib, o‘z faoliyatlarini boshladilar.
Safar davomida
Qoraqalpog‘iston Respublikasiga qilgan xizmat safarida Qonliko‘l tumaniga
respublika vakili sifatida yuborilgan Timur Yusupov bilan uchrashib, yashash
sharoiti bilan yaqindan tanishildi va amalga oshirayotgan ishlari haqida
suhbatlashildi. Hududiy filialda o‘tkazilgan suhbat davomida Bosh direktor
maslahatchisi hokim yordamchilari – respublika vakillari lavozimining joriy
etilishi nafaqat aholi bilan yaqindan ishlash tizimi ularga ancha tajriba va
ko‘nikma berganligini, balki muammoli oilalarga yaqinda yordam berish,
ishsizlarni ish bilan taʼminlash, kasbga yo‘naltirish, xotin-qizlarning
tadbirkorlik tashabbuslarini qo‘llab-quvvatlash va amaliy yordam berish orqali
katta maʼnaviy-maʼrifiy faoliyat yuritishayotgani haqida to‘xtaldi. Sir emas,
oilaviy ajrimlar bugungi kunda dolzarb muammoga aylanib ulgurdi va u ayrim
hollarda moddiy masalaga borib taqalyapti. Jamiyatimizning asosi bo‘lmish oila
institutini yana-da mustahkamlash va rivojlantirish, oilalarni, ayniqsa yosh
oilalarni huquqiy va ijtimoiy-iqtisodiy manfaatlarini himoya qilish hamda
qo‘llab-quvvatlashni kuchaytirish borasida olib borilayotgan barcha ishlarni
sifat jihatidan yangi bosqichga ko‘tarish, jismonan sog‘lom, maʼnaviy yetuk va
har tomonlama rivojlangan barkamol avlodni tarbiyalashda oilaning rolini
oshirish, mustahkam, sog‘lom oilani shakllantirishda mahallaning mavqeini
mustahkamlash va rolini kuchaytirish yo‘lida Davlatimiz rahbari tomonidan aniq
maqsadga yo‘naltirilgan keng ko‘lamli chora-tadbirlar amalga oshirib
kelinmoqda. Hokim yordamchilarining amalga oshirayotgan ishlari orqali
qanchadan qancha yoshlar ish bilan taʼminlanmoqda, xotin-qizlarning orzulari
ushalmoqda, aholi bandligi taʼminlanmoqda, oilalarga xursandchilik
ulashilmoqda. Bu, esa, o‘z o‘rnida oilaga xotirjamlik, totuvlik va baraka olib
kiradi. Tinch va xotirjam to‘liq oilada farzandlar tarbiyasi,
ularning dunyoqarashi, maʼnaviyati, bilimi ham yuqori bo‘ladi. Shu
o‘rinda Prezidentimiz Shavkat Mirziyoyevning quyidagi purhikmat so‘zlariga
eʼtibor qiling: “Eng katta baxt, men buni ming marta qaytarishdan
charchamayman, oilamiz tinch bo‘lsin! Oila kichik vatan, oila tinch bo‘lsa,
baxtli bo‘lsa, vatan tinch bo‘ladi. O‘sha baxtli kunlarni, vatanimizning,
yoshlarimizning kamolini hozir niyat qilayotganimiz kabi ko‘rish hammamizga
nasib etsin!”. Hokim yordamchilari ham o‘z o‘rnida ajralish yoqasiga kelib
qolgan oilalar ishli, maʼlum mablag‘ga egaligi, ko‘nikmalari paydo bo‘lganligi
va oilaga daromad olib kelishi bilan yana birga bo‘lib ketishgani va bu haqida
ularning o‘zlari kelib minnatdorchilik bildirishganini aytishdi.
Undan
tashqari, xonadonlarga kirib o‘tkaziladigan suhbatlar jarayonida yurtimizda
amalga oshirilayotgan islohotlar haqida tushunchalar berish orqali chekka
chekka qishloqlarda yashovchi aholining bugungi kunda barcha jabhalarda
Prezidentimiz tomonidan olib borilayotgan ishlar haqida maʼlumotga ega
bo‘ladilar, hayotga, yashashga, taʼlim olishga qiziqishlari, ertangi kunlariga
ishonchlari ortadi. Chunki aksariyat muammolar bekorchilikdan, yomon hayollarga
berilib, turli noto‘g‘ri qadamlarni qo‘yishdan boshlanadi. Shu nuqtai nazardan
yoshlarni kitobxonlik madaniyatini oshirish, hududlarda joylashgan mahallalar,
taʼlim maskanlari, korxonalar bilan hamkorlikda o‘tkaziladigan turli
maʼnaviy-maʼrifiy uchrashuvlar ham samarali natijalari berishi alohida
taʼkidlandi. Zero, Davlatimiz rahbari taʼkidlaganidek, agar jamiyat hayotining
tayanchi iqtisodiyot bo‘lsa, uning joni va ruhi maʼnaviyatdir.
Xizmat
safari davomidagi keyingi tadbir Beruniy tumani hokimiyatida tadbirkorlar uchun
tashkil etilgan seminar treningda ishtirok etildi. Seminarda
Qoraqalpog‘iston Respublikasi bo‘ylab yirik va startegik investitsiya loyihalari
bo‘yicha ishga tushirilgan, mahalliylashtirish dasturi asosida faoliyat
yuritayotgan va past quvvatda ishlayotgan korxonalar vakillari ishtirokida
xalqaro standartlarni joriy etish, savdodagi texnik to‘siqlar va mahsulotlarni
jahon andozalari asosida muvofiqligini baholashning ahamiyati, tizim
tashkilotlari tomonidan davlat tilida yaratilgan e-metrologiya,
e-akkreditatsiya va e-standart axborot tizimlarining mazmuni va undan
foydalanish qoidalari, davlat tilida yaratilayotgan milliy standartlar va davlat
tiliga tarjima qilinayotgan xalqaro standartlar haqida maʼlumotlar berildi.
Shuningdek, “Isteʼmolchilarning huquqlarini himoya qilish to‘g‘risida”gi
O‘zbekiston Respublikasi Qonunining 5-moddasiga kiritilgan to‘ldirish,
yaʼni ishlab chiqaruvchi (ijrochi, sotuvchi) haqidagi, savdo va xizmat
ko‘rsatish qoidalari to‘g‘risidagi maʼlumot isteʼmolchiga davlat tilida taqdim
etilishi, “Reklama to‘g‘risida”gi Qonun mazmuni mohiyati haqida tushunchalar
berildi. Seminar davomida tadbirkorlar tomonidan berilgan savollarga
mutasaddilar kerakli javoblarni berdilar, Agentlik va tizim tashkilotlari
rasmiy saytlari bilan yaqindan tanishtirdilar.
Shundan so‘ng Agentlik va
hududiy filiallar masʼullari Beruniy tumanida joylashgan «Beruniy Bugdoy
Kluster» masʼuliyati cheklangan jamiyatga tashrif buyurib, filiallar tomonidan
ko‘rsatilayotgan xizmatlar sifati va kelgusidagi hamkorlik masalalari muhokama
qilindi. Mazkur korxona un mahsulotlarini ishlab chiqaradi va hozirgi paytda
Afg‘onistonga eksport kilishni boshlagan. Korxona tomonidan eksport
geografiyasin kengaytirish rejalashtirilgan. Tashrif davomida O‘zbekiston
ilmiy-sinov va sifat nazorati markazi Korakalpogiston filiali korxona tomonidan
ishlab chikargan un mahsulotiga muvofiklik sertifikatini rasmiylashtirdi va
O‘zbekiston Milliy metrologiya instituti Qoraqalpog‘iston filiali tomonidan
o‘lchov vositalari davlat qiyoslovidan o‘tkazilganligi haqida ham muvofiqlik
sertifikati topshirildi. Taʼkidlash lozim, tizim tashkilotlarining davlat
tilida yaratilgan axborot dasturlari orqali beriladigan muvofiqlik
sertifikatlari ham davlat tilida rasmiylashtiriladi. Shuningdek, ishlab
chiqarilayotgan mahsulotning davlat tilida tamg‘alanishiga ham eʼtibor
qaratilib, mavjud kamchiliklar ko‘rsatib o‘tildi va tadbirkorlarga “Isteʼmolchilarning
huquqlarini himoya qilish to‘g‘risida”gi Qonunning ishlab chiqaruvchi (ijrochi,
sotuvchi) haqidagi, savdo va xizmat ko‘rsatish qoidalari to‘g‘risidagi maʼlumot
isteʼmolchiga davlat tilida taqdim etiladi” deb belgilangan tegishli moddalari
mazmun-mohiyati yuzasidan ham tushuntirish ishlari olib borildi. Shuningdek, O‘zbekiston Respublikasining yangi tahrirdagi “Reklama
to‘g‘risida”gi qonun mazmun mohiyati haqida ham tushunchalar berildi.
Safar
davomida “O‘zbekiston bo‘ylab sayohat” loyihasi doirasida hududiy filiallar
xodimlari bilan birgalikda Ellikqalʼa tumanida joylashgan “Sulton Uvays”
ziyoratgohiga tashrif buyurib, marhumlar hurmatiga Qurʼon tilovat qilindi va
tarixiy qadamjoylardan biri hisoblangan “Chilpiq” qo‘rg‘oniga borildi. Xodimlar
boy taassurotlar bilan qaytdilar.
Shunday
qilib, maslahatchining bir kuni o‘z nihoyasiga yetdi. Safardan tegishli
xulosalar chiqarildi, kelgusida qilinadigan ishlar, eʼtibor qaratilishi lozim
bo‘lgan jihatlar belgilab olindi. Bosh direktor maslahatchisi har bir viloyatga
xizmat safari davomida huddi shunday mazmunli, amaliy ishlar, natija va
taassurotlarga boy loyihalar tashkil qilinadi.
Naibaxon
Mamadaliyeva
Bosh direktor
maslahatchisi, fil.fd., prof.