- Bosh sahifa
- Maqolalar
- Millatning eng qadrli boyligi, maʼnaviy qiyofasini aks ettiruvchi muhim vosita, bu – til...
Millatning eng qadrli boyligi, maʼnaviy qiyofasini aks ettiruvchi muhim vosita, bu – til...
Ona tili
ong-u shuurimiz, qalbimizga onalarimiz, buvilarimiz aytgan allalar, aytimlar
orqali singadi. Ularning duolari bilan
endigina tili chiqayotgan go‘dak ona tilini o‘rganadi. Inson uchun eng sevimli
so‘z, shubhasiz, bu uning ismi. Qizlarimiz aytadigan xalq qo‘shiqlaridan biriga
eʼtibor beraylik:
Mudom tusharsiz yodima,
Ko‘p xat yozing o‘z otima,
Quloq soling faryodima,
Sevar yorga mendan salom.
Qo‘shiqdagi lirik qahramon xat aynan uning nomiga yozilishini, uning
nomi tilga olinishini istaydi. Mana shu so‘zlargina uning dilidagi dardlariga
davo bo‘la oladi. Ona tilimiz ota-bobolarimiz, ajdodlarimiz asrlar davomida
asrab-avaylab, sayqallab kelgan muqaddas tushuncha.
Misol uchun, Mahmud Qoshg‘ariyning “Devoni lug‘otit turk” asarida turkiy
xalqlar haqida shunday deyiladi: “Ularning o‘qlaridan saqlanmoq uchun ularning
xatti-harakatlarini mahkam tutmoq har bir aqlli kishiga loyiq va munosibdir.
Bularga yaqin bo‘lish uchun eng asosiy yo‘l ularning tilida so‘zlashishdir,
chunki ular bu tilda so‘zlashuvchilarga yaxshi quloq soladilar, o‘zlarini yaqin
tutadilar, ularga zarar bermaydilar. Hatto ular o‘z panohida turgan
boshqalarning gunohini ham kechib yuboradilar”.
Demak, qadimdan ota-bobolarimiz o‘z tillarini o‘ta yuksak qadrlagan,
hattoki bu tilda so‘zlasha oladiganlarning gunohidan ham kechib yuborgan ekan.
Ona tili ular uchun muqaddas hisoblanib, hech qanday boylik yoki manfaat undan
ustun bo‘lolmagan.
Bugungi globallashuv jarayonida, turli tillar qorishib ketayotgan bir
vaziyatda Koshg‘ariyning yuqoridagi fikrlari barchamizni ogohlikka chaqiradi.
Ajdodlarimizdan meros bo‘lgan bu qadriyatni boy berib qo‘ymaslik uchun barcha
imkoniyatdan samarali foydalanishga undaydi.
Davlatimiz rahbari o‘zbek tiliga davlat tili maqomi berilgan kunga
bag‘ishlangan tantanali marosimda “Dunyo hamjamiyatidan munosib o‘rin
egallashni maqsad qilib qo‘ygan har qaysi davlat, avvalo, o‘z xalqining milliy
tili va madaniyatini asrab-avaylashga, rivojlantirishga intiladi”, deya taʼkidlagan edi.
Prezidentimizning 2019-yil 21-oktabrdagi “O‘zbek tilining davlat tili sifatidagi nufuzi va mavqeini tubdan oshirish chora-tadbirlari to‘g‘risida”gi farmoniga binoan ona tilimizning istiqboldagi taraqqiyotiga oid ko‘plab masalalar o‘z yechimini topmoqda.
Shu ezgu g‘oyaga muvofiq amalga oshirilayotgan keng ko‘lamli islohotlar
jarayonida davlat tilining hayotimizdagi o‘rni va nufuzi tobora oshib
borayotganiga barchamiz guvoh bo‘lib turibmiz. Zero, til har bir millatning eng
qadrli boyligi, uning maʼnaviy qiyofasi, madaniyati, ichki dunyosini aks
ettiruvchi muhim vositadir.
O‘zbekiston Qahramoni, xalq shoiri Erkin Vohidov “So‘z latofati”
asarida: “Ona tili umummillat mulkidir, demak, til oldidagi masʼuliyat ham
umummilliy. Men o‘zbekman, degan har bir inson o‘zbek tili uchun qayg‘urmog‘i
kerak. Unutilgan so‘zlarni tiklash, borini boyitib borish, xorijiy atamalarga
munosib istilohlar topish yolg‘iz tilshunoslarning emas, millatning
ishidir”.
Ushbu fikrlar har birimizni ona tilini sevishga, uning rivojlanishi
uchun o‘z sohamiz bo‘yicha oz bo‘lsa-da, hissa qo‘shishga undaydi. Yaqinda bir
onaxon o‘zi guvoh bo‘lgan voqeani aytib berdi. O‘g‘li chet davlatlardan birida
ham o‘qib, ham ishlar ekan. “Menga kelin topsangiz, chet tillarini
biladiganidan toping”, debdi. U esa “Menga desa, o‘nta tilda gapirmaydimi?
O‘zbek tilini bilmasa, kelin qilmayman. Nabiralarimga ona tilini kim o‘rgatadi,
axir? O‘zga yurtlarda begonalashib ketadi-ku!”, deya o‘z gapini aytgan
onaxon.
O‘zbek tilining qadri, nufuzi yuksalishi uchun mana shu onaxon kabi har
birimiz masʼulmiz. Zero, ona tilimiz biz uchun muqaddas va hech qanday boylik
yoki manfaat undan ustun bo‘lolmaydi.
Kumush ABDUSALOMOVA,
“O‘zkimyosanoat” AJ davlat tilini rivojlantirish bo‘yicha bosh
mutaxassisi